Ou raad by Benevolent is baie stief behandel
In die maand Augustus, wanneer vrouens vereer word, sou mens verwag dat ons Mosselbaaiers ook dié pragtige gebaar sou uitleef en ons plaaslike vrouens se suksesstories moet eer.
Die aand met Benevolent Park se belangrike algemene jaarvergadering, waar ons ouer gardes getraumatiseer was oor hul toekoms en waar die beheerraad 'n noodsein uitgestuur het vir dringende finansiële noodhulp, besluit die oorgrote meerderheid van die teenwoordiges dat dit tyd is om van die ou beheerraad ontslae te raak.
Ek het die oud-bestuurslede bitterlik jammer gekry. Hulle het die afgelope jare, ten spyte van die geweldige negatiewe ongegronde kritiek - baie van sekere inwoners in die media en groot persoonlike opofferings in tyd - energie en geld spandeer om die deure van Benevolent Park oop te hou. Hulle het die geouditeerde verslag voorgelê en al die ander stukke verskaf.
Is dit die manier hoe mense hul eie mense behandel? Dis jammer dat dit die huidige tendens in Suid-Afrika is.
Dit is so tragies dat vroue wat meer as 20 jaar getroue gratis diens gedoen het binne 60 minute uitgeboender is. Na al die trauma van daardie aand kan die inwoners nou rustig voortgaan met hul lewe.
Die nuwe bestuur lyk na ‘n gedugte span met baie bevoegdhede wat die beheerrraad oor die jare so voor gepleit het.
Ter afsluiting, ‘n beroep op die partye, moet asseblief nie sagte teikens soos ouetuise en kerke gebruik vir jul gevegte of as lanseerplekke vir 'moonshot' toetse nie. As die 74 nuwe lede net elk maand elkeen R1 000 insamel of skenk, soos die oud beheerraadslede se familie en vriende, dan is Benevolent Park se probleme iets van die verlede.