DWARSLAT GESELS SPORTSAKE
Dankie tog, dié een is agter die blad! Dwarslat erken dit ruiterlik. Dit was maar 'n senutergende 82 minute om oor daardie eerste hekkie te kom by vanjaar se Wêreldbeker rugbyskouspel toe die Springbokke Skotland in Marseille met 18-3 geklop het. Op die keper beskou, was dit egter 'n oortuigende oorwinning met die Bok-verdediging, wat absoluut uitstaande was.
Om Skotland tot net drie punte te kon beperk en die losskakel, Finn Russell, geen spasie toe te laat nie, het 'n groot rol daarin gespeel dat die gevaarlike oud-Kwagga, Duhan van der Merwe op linkervleuel, ook nie tot sy reg gekom het nie. Russell en Van der Merwe speel baie van mekaar, maar wanneer Russell se keel toegedruk word, bly daar nie veel oor vir Van der Merwe om mee te werk nie.
Dwarslat wonder egter steeds hoekom daar van die Bokke se losskakel-spelskepper en nóg 'n oud-Kwagga, Manie Libbok, verwag is om daardie twee lang strafskoppe vroeg in die eerste helfte pale toe te waag? Sou die beter opsie nie gewees het om die Skotte naby hul doellyn met kantlynskoppe vas te pen en van daar met rolmaalbewegings probeer het om vroeg bresse te slaan nie? Soos daar gedoen is teen die All Blacks in die opwarmingstryd op Twickenham waar die Bokke met 'n rekord-telling van 35-7 geseëvier het.
Libbok het darem vir sy swak vertoning met sy skopwerk (2/5) pale toe, vergoed met die res van sy spel en hy is ook as die Speler van die Wedstryd aangewys.
Daai twee skrums waar die Skotte die Bokke ook net voor rustyd in trurat gedwing het, het Dwarslat amper laat stik aan 'n slukkie wyn, maar met die draaislag was dit duidelik dit sou nie weer gebeur nie. Suid-Afrika is geseënd met twee uitsonderlike voorrye. Die Bokke in hul pajama-truie was ook reusagtig in die lynstane en Pieter-Steph du Toit, wat weer so skerp lyk soos hy in 2019 in Japan was, het ook in dié afdeling sy kant gebring toe Eben Etsebeth die veld met 'n besering verlaat het.
Van die All Blacks gepraat. Hier is 'n span met probleme en 'n mens wonder hoe groot die sielkundige invloed is van die nederlaag 'n paar weke gelede toe die Bokke hulle op Twickenham streepsuiker gegee het.
Verrassings en Wêreldbeker-rugby stap hand-aan-hand. Vra maar vir Heyneke Meyer se Springbokke toe hulle in 2015 deur Japan van alle spanne in Brighton met 34-32 die knie moes buig. Sover was daar nog nie aardskuddende verrassings by vanjaar se toernooi om die Webb Ellistrofee nie behalwe natuurlik Engeland se oorwinning met 27-10 teen die Argentyne.
Die Rose het vir 77 minute net met 14 spelers gespeel ná Tom Curry in die derde minuut gerooikaart is. Die Engelse losskakel, George Ford, het Los Pumas egter ge-Jannie de Beer met drie skep- en ses strafskoppe. De Beer het die einste Rose in 1999 in die kwarteindronde met vyf skepskoppe uit dié toernooi geboender.
Dit bring Dwarslat terug na moontlike verrassings by vanjaar se toernooi. Dit gaan dalk klink na 'n wilde stelling, maar Dwarslat sal glad nie verbaas wees as Italië die All Blacks oor twee weke in Lyon verras nie. Neem ook in ag dat die All Blacks agt van sy laaste 21 toetse - Ierland (3), SuidAfrika (2), Frankryk (2) en Argentinië (1) - verloor het en ook teen Engeland gelykop gespeel het. Hulle is reg om gepluk te word.
Met 'n regtervleuel aan die linkerkant, 'n heelagter op regtervleuel, 'n losskakel op heelagter en drie nommer-6 flanke as 'n lostrio die afgelope Vrydagaand teen die Franse nogals, lyk dinge half deurmekaar by die Kiwi's. Die samespel lyk ook verdag terwyl die skrums net nie meer daai oemf het nie. Om dit alles teen Namibië te probeer regskaaf - geen disrespek teen die Woestynmanne nie - voor die stryd teen Italië, kan perdalks 'n stappie te ver wees.
Dis nog vroeg in die toernooi, maar hier sal indringend na die toepassing van die rooikaart-stelsel gekyk moet word. Daar is net te veel grys gebiede.
Ander sport
Kort na Brad Binder homself in die San Marino Moto GP uit 'n moontlike podiumposisie geval het, het Novak Djokovic van Serwië sy aanspraak om as die GOAT (Greatest of All Time) op die tennisbaan bestempel te word, verstewig. Ná die Amerikaanse tiener Coco Gauff die vorige aand in New York by Flushing Meadows haar tienerhelde, die susters Williams, Venus en Serena, se prestasie nagedoen en haar eerste Amerikaanse Ope titel verower het, het Djoko sy vierde VSA
Ope en 24ste Grand Slam enkelspeltitel gebuit.
Op 36-jarige ouderdom is hy nou die oudste wenner van dié titel en hy is besig om die gaping tussen hom en Roger Federer en Rafael Nadal stadig maar seker te vergroot. Federer van Switseland het na 20 enkelspeltitels uitgetree en Nadal van Spanje met 22 titels, gaan gebuk onder aanhoudende beserings terwyl die Serwiër nog goed genoeg lyk om vir minstens nog 'n paar Grand Slam toernooie sy raket die praatwerk te laat doen.
Hy sal verseker in 2024 die drie Grand Slam titels, wat hy vanjaar verower het, die Australiese, Franse en Amerikaanse Opes, verdedig. Daaroor is geen twyfel nie. Djokovic het net by Wimbledon gestruikel toe hy in die eindstryd in vyf stelle deur die 20-jarige Carlos Alcaraz van Spanje tot oorgawe gedwing is.
Djokovic en die Australiese vrou Margaret Court is nou die gesamentlike houers van Grand Slam enkelspeltitels. Court het as amateur in 1960 haar eerste Grand Slam titel in Australië verower en dit nog twaalf keer gedoen voor die ope era in 1968 aangebreek het. Daarna het sy nog 11 enkelspeltitels bygevoeg.
Met Djokovic, wat in alle waarskynlikheid by Court sal verbyskuif met betrekking tot enkelspeltitels, sal Court, wat 'n prediker is, se algehele Grand Slam totaal van 64 titels nie in Dwarslat se tyd verbeter word nie. Sy het ook 19 dubbelspel- en 21 gemengde dubbelspeltitels verower.