‘n Lig van hoop word aangesteek
Maandag het die son geskyn na die woeste storms en oorstromings van die afgelope naweek, en daarmee saam het die lig deurgebreek vir die Ligtoring Pelgrimstog van Hoop - die roete van die St Blaize ligtoring op Mosselbaai tot by die Agulhas ligtoring.
Staptog begin
Die eerste pelgrims het die afgelope Maandagoggend om 09:00 by die St Blaize ligtoring met die staptog begin, wat oor 17 dae en altesame 326 kilometer strek.
Pelgrims oornag by 16 herbergiers langs die pad wat gasvryheid, 'n bed en kos verskaf.
Die roete strek vir die eerste sewe dae langs die asemrowende kuslyn tot by Jongensfontein. Dan vat pelgrims die pad deur die plase van Vermaaklikheid na Malgas en dan oor die golwende heuwels (rûens) van die Overberg tot by Struisbaai en Agulhas, die suidelikste punt van Afrika, sê Mosselbaai se Gerrie van Deventer, wat die staptog organiseer.
Pelgrims kruis ook sewe riviere op die roete. Die Breederivier sal byvoorbeeld per pont by Malgas oorgesteek moet word terwyl die hangbrug by die Heuningnesrivier by De Mond getoets sal word.
Verkenningstogte
Die groep wat nou stap is amptelik die eerste groep wat bespreek het, ná die roete "oopgestap" is. Twee verkenningstogte is in September 2022 en Maart 2023 gedoen.
Die groepleier, Shirley Theron van Krugersdorp, het op Facebook kennis geneem van dié avontuur en toe navrae begin doen. Sy het al 'n Camino in Spanje voltooi en die lang roetes in die Visrivier Canyon aangepak.
Liesbeth Stoltz kom van Dullstroom en is 'n entoesiastiese pelgrim, wat al verskeie Camino's voltooi het met 'n groot liefde vir die natuur. Sy sê sy deel ook die eto's en waardes van die Pelgrimstog.
Danie en Wilna Biermann van Roodepoort sal op dié tog van 17 dae behoorlik getoets word. Dit sal die eerste keer wees dat hulle net met 'n rugsak gepantser aan 'n avontuur van langer as 'n dag betrokke sal wees.
Die natuur
Hulle is vriende met Shirley, en is fiks van baie stap en trailrunning, maar die idee van 'n pelgrimstog buite in die natuur, die stilte en om op 'n uiterlike en innerlike geestelike reis te gaan, het hulle net aangegryp.
Met die ter perse gaan gister, was die groep tussen Gouritsmond en Gourikwa. Van Deventer het gesê alles verloop baie goed tot dusver. Woensdag was ‘n baie goeie dag, met ‘n groot verskeidenheid wat gesien kon word. By Fransmanshoek was daar baie uitskotmateriaal in die voetpaadjie van die storm. Die stap van Kanon na Gouritsrivier was asemrowend mooi, het Van Deventer gesê. Van Deventer, was vir 16 jaar predikant by die Mosselbaai NG Kerk en is na sy aftrede nou die agent vir die Ligtoring Pelgrimstog. Hy was grootliks verantwoordelik vir die stigting en ontwikkeling van dié pelgrimstog tussen Mosselbaai en Agulhas. 'n Bekwame komitee sien ook om daarna dat alle administrasie, finansies en kommunikasie met betrekking tot die Ligtoring Pelgrimstog doeltreffend gehanteer word.
Rooi hoede
Mosselbaaiers moes al baie die rooi hoede met die ligtoring as logo opgemerk het. Veral in die omgewing tussen Groot-Brakrivier en Mosselbaai.
Dit alles vorm deel van die groter sambreel van 'n Pelgrimstog van Hoop met vier verskillende roetes, wat die roete van Stellenbosch tot Agulhas, Uniondale na Mosselbaai op die Tuinroete Pelgrimstog