Mosselbaai gering geraak ná storms
Die afgelope naweek se storms het skade op verskeie plekke aan die Tuinroete-kuslyn aangerig met veral infrastruktuur wat in die Mosselbaaise munisipale omgewing deurgeloop het, maar vergeleke met ander plekke in die Wes-Kaap, het Mosselbaai lig daarvan afgekom. Erge winde en vloede het lewensverlies en miljoene rande se skade tot gevolg gehad terwyl verskeie dorpe vir lang ure van die buitewêreld afgesny was.
Plaaslik was daar egter enkele gevalle waar inwoners en besighede skade gely het.
Op Sondag, 24 September, om presies 14:23 het 'n sterk wind die dakplate van die Seavuna visverwerkings-aanleg in die hawe afgewaai. Die presiese oomblik wat die dak afgewaai het, is deur Stephanus Cloete op video vasgevang vanaf sy woonstel.
Vanaf die boot
Volgens Kobus Maritz, besturende direkteur van Seavuna, is die sorterings- en graderings-gebou, waar die vis aanvanklik vanaf die boot in die gebou inkom, se dakplate afgeruk. Die los plate en staalstruktuur het op hul beurt weer skade aan die hoofgebou aangerig. "'n Afdak vir parkering se skadunet is ook geskeur en die pypstruktuur is gebuig," vertel Maritz.
"Ons kon egter nog nie die koste bepaal nie. Weens die vakansiedag (Maandag) het ons die dak beveilig en wag ons vir die versekeraars en dan kontrakteurs om die skade te bepaal en met die herstelwerk te begin."
Die Mosselbaai-munisipaliteit het in 'n verklaring gesê munisipale personeel is deur die bank aangewend om aandag aan probleem areas te skenk. Dit het personeel van verkeersdienste, wetstoepassers, brandweer, redding en rampbestuur, strate en stormwater, elektriese dienste, water en sanitasie, parke en ontspanning, afvalbestuur ingesluit terwyl die na-ure munisipale oproepsentrum as 'n geheel op hoë waaksaamheid gebly en vinnig gereageer het op aangemelde voorvalle. Die meeste gerapporteerde voorvalle was weens die skadelike winde.
Stormagtige rukwinde
Op 24 September het Mosselbaai Brandweer, Redding en Rampbestuurdienste (BRR) op 10 voorvalle gereageer as gevolg van skade wat deur die stormagtige rukwinde veroorsaak is. Dit sluit hoofsaaklik skade aan dakplate, sonpanele, heinings en ontwortelde bome of afgebreekte takke in.
Op 25 September het Mosselbaai se BRR op nege voorvalle gereageer as gevolg van skadelike winde van 'n soortgelyke aard as die vorige dag. Benewens skade aan private eiendomme, het munisipale infrastruktuur ook skade opgedoen. Dit sluit skade aan 'n versperringsmuur by 'n pompstasie in 12de Laan, Mosselbaai, glasruite en dakplate wat by die Van Riebeeckstadion losgeruk is en die raamwerke van motorafdakke by die
Gemeenskaplike Operasie-sentrum en by die Mosselbaai Gholflandgoed, wat beskadig is.
Daar is ook verslae ontvang oor robbe en robwelpies wat op plaaslike strande uitgespoel het as gevolg van rowwe see toestande. Geringe oorstromings het voorgekom ná die volgehoue reënval.
Dankbaar
"Ons is dankbaar dat Mosselbaai gespaar is van die ernstige skade wat in ander areas van die Wes-Kaap gesien is. Ons het die weerwaarskuwings noukeurig gevolg en was voorbereid. Ons harte gaan uit na diegene wat enige eiendom of ander skade as gevolg van die storm gely het. Ek wil elke lid van die munisipale administrasie bedank wat verseker het dat ons gemeenskap se noodoproepe gedurende die naweek aandag gekry het," het die munisipale bestuurder, Colin Puren, gesê.
'n Geskatte koste van die skade aan munisipale infrastruktuur is nog nie beskikbaar nie.
Na aanleiding van die vorige naweek se stormvloed wat Saterdag, 16 September, langs die kusgebiede van Mosselbaai ervaar is, sê die munisipaliteit dat 'n strukturele ingenieur aangestel is om die skade te bepaal en is hy opdrag gegee om 'n gedetailleerde verslag voor te berei. Sodra die verslag afgehandel is met sy aanbevelings, sal 'n kostebegroting saamgestel word.
Die Mosselbaai-munisipaliteit sal binne die wettige raamwerk herstelwerk prioritiseer om gereed te wees vir die feesseisoen wat voorlê.