Arende lak Stormers blou
In 'n voorseisoense opwarmingswedstryd het die rugbyspan van die Phangela Suidwestelike Distrikte (SWD) Arende met 64-26 verlede Vrydagaand op Outeniqua Park teen die DHL Stormers streepsuiker gekry, maar die besoekers het gewéét hulle was betrokke in 'n oorlog in die kleine. Die Arende se fisieke spel het 'n volgepakte stadion kort-kort na sy asem laat snak soos daar onder die meer gerekende Stormers ingeklim is.
Die oorwegend Stormers-vlae veral op die hoofpaviljoen, het hoe later hoe laer begin swaai soos die Arende die opposisie bekstil geduik het.
Selfs John Dobson, afrigter van die Stormers, was vol lof vir die tuisspan se inklimspel. "Moenie dat die telling jou flous nie. My spelers wéét hulle was in 'n baie fisieke stryd betrokke en daar gaan 'n paar seer lywe môreoggend hulself uit hul beddens sleep. Dit voorspel goed vir die Arende se seisoen wat voorlê en ek dink ons kan volgende Vrydagmiddag (vanmiddag) meer van dieselfde verwag wanneer ons met 'n Westelike Provinsie (WP) XV-tal weer teen die Arende te staan kom," het Dobson gesê.
Dié wedstryd waarna Dobson verwys, dien as voorwedstryd voor 'n opwarmingswedstryd tussen die Stormers en die Sharks om 18:30 óók op Outeniqua Park afskop. Die vyftientalle van die WP en die Arende se wedstryd begin om 16:00.
Alles gegee
Anton Moolman, afrigter van die Arende, was self in sy skik met die manier waarop sy troepe onder die Stormers ingeklim het. "Alles wat ek gevra het, het hulle gegee en ek is werklik in my skik met hoe ons gespeel het. Die telling is bysaak. Waaroor dit vir my gegaan het, was dit wat tussen die vier lyne gebeur het en daar het hulle alles gegee. Die feit dat ons basies net drie dae se voorbereiding kon inpas vóór dié wedstryd, maak dit nog meer spesiaal," het Moolman gesê.
Die Moolman-troepe se seisoen begin basies eers op 1 November, wanneer meeste van die spelers se kontrakte dan eers inskop. Hyself het eers verlede Maandag uit Frankryk teruggekeer waar hy die skitterende toets in Groep B van die Wêreldbeker-toernooi in Parys tussen Suid-Afrika en Ierland bygewoon het. Voor Moolman die pos as hoofafrigter van die Arende verlede jaar aanvaar het, het hy ook vir bykans drie jaar in Frankryk afgerig waar hy ook die direkteur van jeugontwikkeling by die Aúvergne-Rhone-Alpes-klub was.
Voor dit het Moolman en Dobson ook vir ses jaar nou saam gewerk toe die Arendebreier die direkteur van die WP Akademie was.
Sy betrokkenheid en visie met die ontwikkeling van veral die jonger garde spelers, het ook daartoe aanleiding gegee dat Moolman een van die SWD-helde teen die Stormers, die nommer 4-slot Ethan Stuurman, van 'n strand op Plettenbergbaai oorgehaal het om rugby sy toekoms te maak.
"Ek het dié outjie verlede jaar opgemerk terwyl hy as lewensredder sy werk op die strand gedoen het. Hy het 'n teenwoordigheid gehad en ek moes net met hom praat. Ná ons 'n paar woorde gewissel het, het ek geweet ek moes hom oorhaal om vir die Arende te kom speel. Ek het met sy ouers gaan praat en ná ons dinge uitgestryk het, het hy by ons ingeval en ek is daarvan oortuig hy gaan in die Suid-Afrikaanse weergawe van die Aussie Will Skelton ontwikkel. Ek is baie opgewonde oor dit wat vir hom voorlê," het Moolman gesê.
Stuurman, wat op 22-jarige ouderdom 2.01 meter in sy sokkies staan en die skaal op 140kg raaktrap, het inderdaad teen die Stormers 'n skitterende vertoning gelewer. Dit was egter sy vreeslose verdediging, wat die oog die meeste getref het. En daarvan sou 'n hele klompie van die Stormers kon getuig. Diegene wat die yster-slot Bakkies Botha kan onthou, kan maar 'n kantaantekening maak van dié jongeling.
Selfs Dobson het hom uitgesonder en dit kan natuurlik in die toekoms tot Moolman se nadeel strek. Dobson het 'n besondere insig tot die spel en dit sal niemand verbaas as Stuurman nie te ver in die toekoms sy oproep-instruksies kry om hom by die Stormers aan te sluit nie!
Puntemakers
Stormers 64 (38): Drieë: Mnombo Zwelendaba, Jurie Matthee, Stefan Ungerer, Clayton Blommetjies, Gary Porter, Scarra Ntubeni, Juan de Jongh, Cortnall Skosan, JJ Kotzé, Lizo Gqoboka. Doelskoppe: Matthee (7).
Arende 26 (14): Drieë: Steph Leonard, Josh Vermeulen, Lukman Yaya, Burton Booysen. Doelskoppe: Vermeulen (3).