Toughest Firefigters Alive
Emile Conrad van die Tuinroete Distriksmunisipaliteit is verlede week, hier op Mosselbaai, vir die sesde keer as die wenner in die afdeling vir mans aangewys in die 2023 Suid-Afrikaanse Toughest Firefighters Alive (TFA) kompetisie.
Conrad moes verlede jaar, toe dié uitputtende kompetisie ook by De Bakke op Mosselbaai aangebied is, toesien hoe Hermanus Gouws van die Wes-Rand hom onttroon, maar dié nederige Suid-Kapenaar het vanjaar teruggeslaan en dié titel herwin. "Dit is nooit maklik nie en dit is wonderlik om te sien hoe die deelnemers die vlak van mededingendheid en fisiese kondisie verhoog. Dit is eintlik 'n oorwinning vir die brandweerdiens regoor Suid-Afrika om te sien hoe brandweermanne in hul prestasie en fiksheidsvlakke groei. Toestande verander voortdurend en die omgewing kan onvoorspelbaar wees. Fisiese fiksheid berei jou hiervoor voor," sê Conrad.
In die afdeling vir vroue het Msithamako Moswete van die Wes-Rand gewen. Die opgewonde Moswete het aan die Mossel Bay Advertiser vertel dat dit haar eerste poging was en sy kon skaars glo dat sy dit reggekry het. Sy is reeds 14 jaar in diens van die brandweer. "Om 'n goeie brandweerman te wees, moet jy hou van wat jy doen en jou beste daaraan gee," het sy ná haar oorwinning gesê.
Beide die manlike en vroulike wenspanne kom van die Wes-Rand.
Mosselbaaiers
Die titel vir die beste plaaslike brandweerman is aan JC Botha toegeken en die Mosselbaai vrouespan is as die beste vroulike span gekroon.
Meer as 240 deelnemers het die 30 spanne uitgemaak, wat oor 'n tydperk van drie dae deelgeneem het in baie moeilike weersomstandighede.
Dit was die tweede keer dat die kompetisie op Mosselbaai aangebied is en die deelnemers sal terug wees vir meer daarvan in 2024.
Mark Smith van Toughest Firefighter Alive SA (TFA) het by die prysuitdeling die afgelope Saterdag, 7 Oktober, bevestig dat die TFA 2023 die grootste van sy soort tot op hede was met net minder as 250 deelnemers. Smith het ook bevestig dat TFA gekwalifiseerde Suid-Afrikaanse brandweermanne gaan inskryf vir 'n internasionale kompetisie, wat aanstaande jaar in Denemarke plaasvind.
"Die Suid-Afrikaanse uitdaging is uniek omdat dit werklik brandweermanne se vasberadenheid toets. Ons kompetisie is die grootste in Afrika en vergelyk goed met internasionale kompetisies. As 'n nasie het ons geleer om vele struikelblokke te oorkom. Dit kom na vore in hoe die TFA aangebied word en die taaiheid wat deur die deelnemers in die kompetisie getoon word," het Smith gesê.
Boodskap van burgemeester
In sy toespraak het die uitvoerende burgemeester van Mosselbaai, raadsheer Dirk Kotzé, kommentaar gelewer oor die noodsaaklikheid om gesondheid, die vermoë om te kompeteer, en die voorreg van die deelnemers om as rolmodelle in die gemeenskap beskou te word, te vier.
"Tydens die kompetisie het julle julself tot breekpunt gedwing onder alles behalwe perfekte omstandighede. Ons sal nooit beheer hê oor al die omstandighede nie, ons sal net beheer hê oor hoe ons reageer op die omstandighede. As ons pro-aktief wil wees, moet ons ook voorberei. Beplan, berei voor, oefen, en in daardie proses sal ons onsself toerus om aan te pas by en te reageer op enige omstandigheid wat die lewe ons voorskiet," het hy gesê.
"Brandweermanne verstaan beter as die meeste die woorde van die hokvegter, Dan Miller. Hy het gesê: 'Wag nie op perfekte omstandighede vir sukses om te gebeur nie; gaan net voort en doen iets!' Julle het bewys dat omstandighede nie goed of sleg is nie. Julle het bewys dat omstandighede net dit is; omstandighede. Dankie dat julle Mosselbaai herinner het dat perfekte omstandighede nie noodsaaklik is nie, net vasberadenheid en determinasie."
Hoofbrandweerbeampte van Mosselbaai,
Joseph Johnston, het die brandweerlede daaraan herinner dat hulle as professionele persone in hul veld van kundigheid beskou word - ook op die wêreldwye verhoog. "Die naweek het julle vir jul plesier meegeding. Dit was egter bloed, sweet en trane. Maar dit is nooit tevergeefs nie, ons weet hoekom ons dit doen - om professioneel te wees in alles wat ons doen. Selfs as die beloning net die glimlagte van die gemeenskap is." Johnston het spesifieke melding gemaak van die vrywilligers wat gehelp het en bygedra het tot die sukses van dié byeenkoms.
Ryan Abrahams van Firefighters for Excellence het waarderingsbekers aan die Mosselbaai-munisipaliteit, die Tuinroete Distriksmunisipaliteit, 'n privaat ambulansdiens in Mosselbaai, By Grace EMS, en Southey Contracting oorhandig om hulle te bedank vir hul ondersteuning met die