Nuwe hoof wil uitnemende samewerking sien gebeur
Die Mosselbaai-munisipaliteit se reaksieeenheid wat uit wetstoepassers asook die honde-eenheid bestaan, het onlangs hul eerste hoof gekry toe Marko Claassen in die posisie aangestel is. Claassen, het na sy nasionale diensplig by die Suid-Afrikaanse Polisiediens aangesluit en was spesifiek vir etlike jare aan die openbare orde-eenheid (POPS) op Oudtshoorn en George verbonde. Hy het ook binne die SAPD, op nasionale front opleiding ter voorbereiding van die Wêreldbekersokkertoernooi van 2010 in hierdie spesialisveld gegee.
Claassen het jarelange ervaring in die menslike hulpbronveld, ook in diens van die SAPD waarvandaan hy in September vanjaar by die Mosselbaaimunisipaliteit kom aansluit het. Tydens sy jare by menslike hulpbronbestuur, het hy veral opleiding in vuurwapens, die wetgewing hierrondom, asook taktiese opleiding hanteer.
Dit is danksy sy ervaring in taktiese opleiding dat Claassen se pad tot in Mosselbaai geloop het. Toe die Mosselbaaimunisipaliteit in Junie 2022
die eerste in die Wes-Kaap geword het om ‘n reaksie-eenheid om te lei, het Claassen ‘n belangrike rol gespeel. Die reaksie-eenheid is by Bnei Akiva in Hartenbos deur SAPDpersoneel opgelei.
Vir Claassen is samewerking tussen rolspelers getaak met publieke en gemeenskapsveiligheid van kardinale belang.
"Ek sal graag wil toesien dat die munisipale reaksieeenheid is sy geheel noue samewerking met die SAPD, asook munisipale en provinsiale verkeersdienste moet hê. Hoewel die eenheid allermins die polisie en verkeersdienste se werk kan of mag doen, moet dit binne die wetlike raamwerk dien as ‘n verlenging en versterking van veiligheidsdienslewering aan die gemeenskap. As die reaksie-eenheid in die publieke oog is, is dit my doelwit dat die gemeenskap altyd moet weet dat al is hulle daar om ‘n baie spesifieke werk te verrig, hulle dit altyd in die gemeenskap se belang doen.”
Claassen, die trotse oupa van twee kleindogters, is getroud met Brandolene en die egpaar het twee seuns.