Aksievolle naweek op sportkalender
'n Fees van rugby, netbal en sokker aksie vind hierdie naweek by die D'Almeida-sportstadion plaas wanneer vanjaar se gewilde Burgemeesterstoernooi gehou word. Die toernooi fokus veral daarop om aan sportspanne in die landelike gebiede ‘n platform te bied om hulle slag te kom wys.
Wat vanjaar besonder opwindend is, is die insluiting van sokkerspanne, wat vir die eerste keer deel van die toernooi sal wees.
Die aksie skop vandag, Vrydag 13 Oktober, om 18:00 af wanneer Groot-Brakrivier se jonges wat by die Jeugkafee betrokke is, die naweek se program afskop met ‘n oop mikrofoon-sessie vir rymkletsers, sangers, dansers en meer.
Die sport aksie begin môre, Saterdag 14 Oktober, om 10:00 wanneer minstens 10 spanne uit elke sportkode op die onderskeie baie in aksie gaan wees om te bepaal wie vanjaar se netbal-, rugby- en sokkerkampioene gaan wees. Daar is ook twee ontwikkelingspanne van Groot-Brakrivier, asook Barbariansrugbyklubs, wat ook ‘n wedstryd sal speel. Nog ‘n nuutjie is ‘n span van Sonskynvallei, wat vir die eerste keer in die toernooi te sien sal wees.
Die sokkertoernooi vind op 14 Oktober op die Uitbreiding 23-sportgronde plaas. Die toernooi, ook die sokker, word op 15 Oktober by die D’Almeidastadion beklink, nadat die uitspeelrondes voltooi is. Die aksie begin weer om 10:00.
Suidwestelike Distrikte Rugby en Netbal is ook teenwoordig om te verseker dat die uitspeelrondes volgens die korrekte prosedure verloop.
Toegang is gratis. Toeskouers kan uitsien na verskeie kos- en ander stalletjies, waar te ete en te drinke beskikbaar sal wees.