Verskeie sake krap die gemeenskap om
'n Geweldige gevoel van ontsteltenis het geheers by 'n onlangse gemeenskapsvergadering wat op Reebok saamgeroep is. Die meeste van dié ontsteltenis is voor die deur van die Mosselbaai-munisipaliteit gelê. Sowat 130 gemeenskapslede het dié vergadering bygewoon, waar verskeie knellende kwessies geopper is.
Die algemene boodskap, wat van die samekoms weggeneem kon word, was dat die teenwoordige gemeenskapslede geweldig ongelukkig is met hoe die munisipaliteit te werk gaan en die beleide wat die munisipaliteit implimenteer. Soveel so dat sommige lede daar hul raadslede daarvan beskuldig het dat hulle hul party dien in plaas van die gemeenskap. Daar was ‘n raadslid van die VF Plus (Willie Liebenberg) sowel as een van die ACDP (Jeanette Gouws) teenwoordig.
Die hoofbesprekingspunte was kommunikasie vanaf die munisipaliteit, elektrisiteitstariewe, kostes aan solar-verbonde instellings en die kostes met betrekking tot rioolaansluiting.
Sommige inwoners meen baie van die besluite, wat die munisipaliteit implementeer, hoor hulle eers van sodra hulle daarvoor moet begin betaal. Hulle voel hulle word nie genoeg kans gegun om insae te lewer met sulke besluite nie, en word bloot daarvan ingelig wanneer dit gebeur.
Hulle sê hulle kan eenvoudig nie meer die uitgawes bekostig nie en ook dat die munisipaliteit geld onnodig op ander plekke spandeer en nie op noodsaaklikhede nie.
Die sameroepers van die vergadering het gesê 'n versoekskrif, wat die kwessies saamvat, sal aan die munisipaliteit oorhandig word.
Ná afloop van die vergadering het Mossel Bay Advertiser die volgende vrae aan die munisipaliteit gestel:
1. Het die munisipaliteit vooraf van die vergadering geweet? Indien wel, is daar ‘n rede hoekom ander raadslede nie daar was nie?
Dit is belangrik om daarop te let dat die vergadering nie ‘n munisipale vergadering was nie. Geen raadslede of amptenare is na die vergadering genooi nie. Inteendeel, die munisipaliteit inisiëer en skeduleer self vergaderings in wyke, soos nodig en reageer ook met graagte op versoeke uit die gemeenskap sou daar ‘n openbare vergadering verlang word. Die gemeenskap word aangemoedig om die behoefte aan ‘n openbare vergadering deur middel van hulle wykskomitee en wyksraadslid te kommunikeer, óf om ‘n versoek te rig aan die munisipaliteit deur ‘n e-pos na admin@
mosselbay.gov.za te stuur. Op dié manier ontvang die versoek ‘n verwysingsnommer wat in alle opvolgkommunikasie gebruik kan word.
2. Sal die munisipaliteit dit oorweeg om ‘n soortgelyke vergadering te reël waar inwoners hul kwessies na vore kan bring?
Die Mosselbaaimunisipaliteit plaas ‘n hoë premie op kommunikasie. Inteendeel, dit is algemeen bekend dat beide die uitvoerende burgemeester asook die munisipale bestuurder ‘n oopdeur-beleid volg.
Die munisipaliteit het pas sy publieke konsultasieproses rakende die geïntegreerde ontwikkelingsplan en begroting 2024/25 in September deurloop. Sedert Maart 2023, is 51 openbare deelname- en terugvoeringsessies met die gemeenskap gehou. Hierbenewens hou wyksraadslede ook individueel in hulle wyke terugvoeringvergaderings wat aan inwoners gekommunikeer word. Dit is ‘n algemene gebruik dat direkteure en ander munisipale amptenare op dié platforms aan inwoners inligting voorsien en vrae beantwoord, soos versoek word.
3. Het die munisipaliteit ‘n reaksie op die gemeenskap se ongelukkigheid? Veral hul gevoel dat hul belange nie verteenwoordig word nie?
Die Mosselbaai-munisipaliteit se missiestelling hou 'n onwrikbare belofte in. Dit is “om kostedoeltreffende en volhoubare dienste aan die hele gemeenskap met ywer en empatie te lewer”. Dit is dié empatie wat meegebring het dat Mosselbaaimunisipaliteit
agtereenvolgens die laagste tariefverhogings in die Tuinroete vir die afgelope vyf jaar aangeteken het. Die munisipaliteit is meelewend wat betref die toename in lewenskoste en dat inwoners al hoe meer sukkel om kop bo water te hou. Vergeleke met die nasionale regering, word op plaaslike regeringsvlak alles moontlik gedoen om die las van tariewe en belastings betaalbaar aan die munisipaliteit, tot die absolute minimum te beperk en effektief te bestuur.
(Die munisipaliteit verwys hier na nuusbriewe in Augustus en September uitgereik en wat op versagtende maatreëls fokus.)
4. Is daar enige nuwe inligting oor die bogenoemde besprekingspunte wat onlangs uitgereik is? Of inligting wat die munisipaliteit weer sal wil uitlig?
‘n Brief uit die kantoor van die burgemeester word vandeesweek versprei waarin verskeie kwessies vervat word. Die brief vervat en herhaal kommunikasie wat reeds herhaaldelik op ‘n verskeidenheid platforms sedert April vanjaar met die publiek gedeel is (sien maniere van media wat ingespan word in vraag 5).
5. Watter maniere van kommunikasie gebruik die munisipaliteit om met die gemeenskap te kommunikeer?
(Die munisipaliteit het kommunikasie aangaande tariefverhogings spesifiek aangespreek. Vind dié verduideliking in die aanlynweergawe van hierdie artikel)
Die munisipaliteit heg groot waarde aan wedersydse kommunikasie. Inwoners kan gerus gebruik maak van die Collab Citizen munisipale slimfoontoepassing, ‘n gebruikersvriendelike hulpmiddel wat die individuele gebruiker kan aanpas by sy of haar behoeftes. Dit kan afgelaai word by Huawei AppGallery, Apple App Store of Google Play Store. Met behulp van dié toepassing kan diensleweringsklagtes aangemeld word, elektrisiteit gekoop word, munisipale rekenings betaal word, toegang tot die munisipaliteit se webtuiste verkry word, en meer. Van groot nut is die onmiddellike beskikbaarheid van blitskennisgewings aangaande padsluitings, kragonderbrekings en die toegang tot relevante nuusartikels.
Daar is ook die munisipale webblad waar alle nuusbriewe (https://www.mosselbay. gov.za/news-letter-index), asook relevante nuusartikels (https://www.mosselbay.gov.za/ news-index) beskikbaar is.
Die munisipaliteit kommunikeer omvattend. Benewens munisipale nuusbriewe, wat maandeliks per e-pos versprei word, is daar ook gereelde nuusbriewe deur die burgemeester en
munisipale bestuurder, wat ook per e-pos versprei word.
Indien inwoners se e-posadresse nie op die munisipale databasis geregistreer is nie, word u uitgenooi om dit deur te gee na admin@mosselbay.gov.za Die munisipaliteit maak ook gebruik van advertensies in die Mossel Bay Advertiser, onder meer om gemeenskapsvergaderings aan te kondig, asook om tenders of poste te publiseer. Munisipale werksaamhede kry ook gereeld dekking in die gedrukte media, wat plaaslik asook nasionaal gepubliseer word.
Die munisipaliteit doen ook twee-weekliks radioprogramme oor relevante kwessies op plaaslike radiostasies soos Tambo FM, HeartBeat FM en Eden FM.
Die onderwerpe word voor uitsending bekend gemaak en op verskeie sosiale mediaplatforms versprei.
Die munisipale sosiale mediablad is steeds 'n gewilde manier om inligting vinnig by gemeenskappe te kry. Volg gerus die blad by https://www.facebook.com/mosselbaymun.
Wyksraadslede hou gereeld terugvoervergaderings in die onderskeie wyke. Inwoners kan hulle wyksraadslid kontak vir die spesifieke datums. Die wyksraadslede gebruik veral WhatsAppgroepe om hierdie en ander inligting na inwoners deur te gee.
Verder word inligting op ‘n verskeidenheid WhatsApp-groepe gedeel wat insluit geloofsgebaseerdegroepe, buurtwaggroepe, sakeondernemings, mediagroepe en dies meer.
‘n Wykskomitee WhatApp-groepstelsel word ook benut om munisipale inligting te versprei.
Rig enige kwessies of navrae aan admin@ mosselbay.gov.za – hiervolgens sal u navraag op die munisipaliteit se werksvloeiprogram gelaai word, waarna u 'n verwysingsnommer sal ontvang wat u tydens enige opvolgkommunikasie kan gebruik.
6. Hoe kan die munisipaliteit die gemeenskap verseker dat gelde op die bes moontlike plekke aangewend word?
Mosselbaai-munisipaliteit is volgens Ratings Afrika gesamentlik derde geplaas op die 2022 munisipale finansiële volhoubaarheidsindeks. Verder het die Mosselbaai-munisipaliteit ‘n geskiedenis van sterk begrotingsbestuur wat gereflekteer word in ‘n gesonde finansiele posisie.
Die munisipaliteit is ook trots op sy agtereenvolgende skoon oudits behaal. Met al hierdie elemente in plek, het die munisipaliteit boonop ‘n besondere vertoningslys van uitnemende dienslewering.
'n Skakel na "Begroting: Inwoners maak die verskil | Mossel Bay Advertiser" sal op die aanlynweergawe van dié artikel beskikbaar wees.