Buffalo Rally 2023
Die Nomads Motorfietsklub van Kaapstad bied die naweek van 27 tot 29 Oktober die Buffalo Rally by die ATKVoord op Hartenbos aan.
Dit sal vanjaar die 16de geleentheid van sy soort op Mosselbaai wees. Die Buffalo Rally is uiters gewild onder motorfietsryers.
Die voorsitter van die Nomads Motorfietsklub, Luderick Jacoby, sê so ‘n grootse geleentheid waar duisende motorfietsryers na die dorp kom, bied sy eie uitdagings.
“Terwyl ons ons uiterste bes doen om enige ongerief uit te skakel of tot die minimum te beperk, doen ons ‘n beroep op die gemeenskap om ons motorfietsryers asseblief vir die naweek te verdra,” sê Jacoby. Jacoby sê hulle is bewus daarvan dat een van die grootste ongerieflikhede die onnodige geryery van motorfietse laat in die nag en selfs dalk tot in die vroeë oggendure is.
“Ons wil u verseker dat ons ons bes doen om dit te probeer beheer, maar met ‘n geleentheid so groot en met die beperkte kampterrein, is dit byna ‘n onmoontlike taak om dit heeltemal te keer.”
Jacoby sê soos in die verlede, hoop hulle dat die inwoners van Mosselbaai die naweek net soveel sal geniet soos die talle motorfietsryers, wat die dorp besoek. “Die publiek is welkom om op Saterdag, 28 Oktober, vanaf 11:00 by die Hartenbos Seefront Sentrum in te loer om van die unieke motorfietse te besigtig.
Die motorfietsoptog sal op Saterdag, 28 Oktober, om 11:00 van Georgeweg, net na die ingang na Santos/De Bakke-Oord vertrek en ‘n sirkelroete via Die Punt, die R102, Louis Fourieweg, regs in die N2, en terug na die ATKV-oord, deur die 397 Oudtshoorn/ Hartenbos afrit te neem.
Dit sal vanjaar die 16de geleentheid van sy soort op Mosselbaai wees.