Arende kry kans om vere reg te skud
Die rugbyspan van die Suidwestelike Distrikte (SWD), kry vanaand op Outeniqua Park die laaste geleentheid om in 'n voorseisoense wedstryd betrokke te raak wanneer die Phangela Arende teen Jimmy Stonehouse se Air Link Pumas van Mpumalanga te staan kom. Die Pumas het twee seisoene gelede die gesogte Currie Beker verower en in die laaste weergawe van dié toernooi vroëer vanjaar as naaswenner uit die stryd getree toe die Vrystaat met 25-17 die Pumas in die eindstryd in Bloemfontein geklop het.
Die Arende se breier, Anton Moolman, sê vir hom is dit belangrik om sy spelers teen hoë kwaliteit opposisie te toets voor die seisoen amptelik oor 'n paar weke afskop. "My groep se kontrakte skop eers die 1ste November in werking, maar dit is belangrik dat ons in die opbou-fase soveel as moontlik getoets word. Met die nuwe SA Beker-kompetisie wat eersdaags begin, is dit belangrik omdat ons teen spanne soos die Pumas, Vrystaat, Griekwaland-Wes en die Noord-Vrystaatse Griffons op die dieselfde vlak sal moet meeding," het hy gesê.
Moolman se groep spelers vir die nuwe kompetisie is basies gefinaliseer. "Daar is nog hier en daar waar ek na van die spelers moet kyk en finale besluite moet neem, maar ek voel ons het 'n goeie groep spelers bymekaar kon trek en ek sien uit na die seisoen," het hy gesê.
Onderstreep
Waar die Suid-Afrikaanse Rugby-unie (Saru) 'n perk van 35 gekontrakteerde spelers vir spanne soos die Arende daarstel, sê Moolman hy het besluit om 32 spelers te kontrakteer. "Dit sal my die vryheid gee om ook met klubspelers, wat nog nie in die senior stelsel is nie, te onderhandel vir sekere wedstryde en om ook van hulle in te bring. Daar is goeie talent wat in die klubstelsel is en ons moet van hulle gebruik maak on talent verder te ontwikkel," het hy gesê.
Moolman se stelling word duidelik onderstreep met die Arende se klubkampioen, Crusaders, wat in die pas afgelope nasionale uitklop-klubkompetisie tot in die halfeindstryd gevorder het waar hulle op die ou einde teen die Naka Bulle die knie moes buig. 32 Spanne het aan dié kompetisie deelgeneem en om tot die laaste vier te kon vorder, was geen geringe prestasie nie.
Heidelberg was die SWD se ander verteenwoordiger in dié kompetisie, maar is ná die eerste ronde reeds uitgeskakel toe hulle teen Valsbaai verloor het.
In 'n voorwedstryd vir die Arende en die Pumas, gaan 'n Klub Uitnodigingspan ook teen 'n Pumas XV-tal te staan kom. "Omdat die voorste vier spanne in die klubkompetisie hulself gereed moet kry vir die halfeindstryde aanstaande week, is spelers van die spanne nie oorweeg nie en die span teen die Pumas XV-tal sal saamgestel word uit spelers van spanne wat nie die halfeindronde gehaal het nie. Dit sal ook interessant wees om te sien hoe daar teen die besoekers opgeweeg sal word," het Moolman gesê.
‘Daar is goeie talent wat in die klubstelsel is en ons moet van hulle gebruik maak on talent verder te ontwikkel.’
Raakgevat
Moolman kon ook nie uitgepraat raak oor die Springbokke se skitterende oorwinning die afgelope Sondagaand toe hulle in 'n aksie-belaaide kwarteindstryd van vanjaar se Wêreldbeker-toernooi met die gasheer, Frankryk, in Parys met 29-28 klaargespeel het.
Voor Moolman die pos as hooafrigter by die Arende aanvaar het, het hy ook vir bykans 3 jaar in Frankryk afgerig.
"Ek kan nie dink dat ek al 'n meer spanningsvolle eerste helfte van 'n wedstryd op dié vlak gesien het nie.
Dit was absoluut waansinning soos die pendulum die heeltyd geswaai het en uit 'n
afrigters-oogpunt kan ek net my hoed lig vir Rassie Erasmus en Jacques Nienaber se voorbereiding vir dié wedstryd.
Hulle het absoluut raakgevat. Baie mense sal nie verstaan waarom sekere dinge op die veld uitgevoer is nie, maar dié twee het hul huiswerk gedoen en dit was duidelik weerspieël met sekere van die besluite, wat op die veld gedoen is.
Dit was epies en ek het baie vertroue dat die Bokke hul titel suksesvol kan verdedig," het hy gesê.
Vandag se aksie op Outeniqua Park begin om 15:30 met die voorwedstryd terwyl die Arende en die Pumas mekaar om 18:00 die stryd aansê.