Spanne is hard aan die werk met groot opruiming
Skoonmaakspanne van die Mosselbaaimunisipaliteit was op Maandag, 23 Oktober, reeds druk besig op Klein-Brakrivier se strand met op opruimingswerk nadat die rivier in vloed was die afgelope naweek en groot hoeveelhede opdrifsels op die stand agtergelaat is. Die spanne, wat deel vorm van die uitgebreide openbare werke program, is onder meer inwoners van Powertown.
Groot hoeveelhede opgedamde water is op Maandag, 23 Oktober, uit die informele woongebied na die rivier gedreineer. Ten spyte van die ontwrigting by hul wonings, het werkers voltallig opgedaag vir werk en behoorlik ingeklim onder die opdrifsels.
Spanne
Die Mosselbaai-munisipaliteit maak gebruik van verskeie skoonmaakspanne as deel van die uitgebreide openbare werke program. Spanne word gewerf uit die woongebiede van spesifieke fokusareas. Daar is drie spanne werksaam wat die gebiede van die Punt, Mosselbaai tot by Glentana dek. Die spanne word uit plaaslike gemeenskappe gekies en deur die departement van bosbou, visserye en omgewing aangestel. Gebiede waaruit die spanne werk, is soos volg: Streek 1 (Mosselbaai – KwaNonqaba, Asla Park, D’Almeida), Streek 2 (Klein-Brakrivier – Powertown), Streek 3 (Groot-Brakrivier – Greenhaven).
Vir die twee weke ná die stormseetoestande op 16 September, is daar van 18 September tot 2 Oktober sowat 1400 vullissakke met rommel bymekaar- en weggemaak. Van 16 September tot 15 Oktober het die spanne ook 230 mariene karkasse verwyder. ‘n Groot hoeveelheid hiervan was robbe en ofskoon die Staatsveearts monsters geneem het, blyk dit dat dit bloot die stormsee-toestande en sterk getye was, wat dié sterftes veroorsaak het.
Lede van die publiek, wat van klein vaartuie gebruik maak vir ontspanning, word gemaan om bedag te wees vir obstruksies wat in riviere soos die KleinBrakrivier mag voorkom. Ná die afgelope naweek se vloede, is onder meer groot takke en boomstompe meegesleur wat onder die wateroppervlak mag wees en navigasie kan bemoeilik. Die munisipaliteit se skoonmaakwerk duur egter voort.
Strandtoegang
Lede van die publiek word ook daaraan herinner dat publieke toegang tot sommige gedeeltes van strande steeds afgesper is ná die stormskade in September. Die Mosselbaai-munisipaliteit het ‘n strukturele ingenieur aangestel om ‘n omvattende verslag saam te stel waarna die herstelproses in aanvang sal neem. Terugvoering is in ‘n gevorderde stadium en verskeie konsultante sal betrokke wees met die herstelwerk.
Geen kritiese munispale infrastruktuur is gedurende die stormsee-toestande van 16 September beskadig nie. Houttrappe wat as strandtoegangsroetes dien en wandelpaaie, wat naby die kus geleë is, word hierdeur geraak. Lede van die publiek word versoek om vir hulle eie veiligheid, nie afgesperde toegangsroetes te gebruik nie en ook om nie nuwe roetes te skep, wat tot skade aan die kusomgewing kan lei nie. Herstelwerk sal op ‘n prioriteitsbasis gedoen word met die oog op die naderende vakansieseisoen.