Weermaglede gedenk afgestorwe soldate
Die Suid-Afrikaanse Weermagvereniging (SAWV) Eenheid Spekboom (Oudtshoorn), het op Saterdag, 14 Oktober, om 11:00 'n Operasie White Dove gedenkdiens gehou by Kobus se Gat onder die Swartberge op die R328. By die gedenkdiens is 'n houtkruis onthul ter ere van die wyle sersant-majoor Lloyd Calitz. Die gedenkkruis sal dien as die SA Weermagvereniging se gedenkteken ter erkenning van gevalle soldate vanuit die Oudtshoorn-omgewing.
Calitz, wat drie jaar gelede met die ontstaan van Eenheid Spekboom sou kom kuier het, het op die nipper gekanselleer en is kort daarna, op Woensdag, 7 Oktober, oorlede. Die SAWV Eenheid Spekboom se stigting drie jaar gelede was ook op die perseel van Kobus Lategan waar die kruis tans by Kobus se Gat staan.
Pieter Cillie, nadat hy met kanker gediagnoseer is en geïnspireer is deur die lied "Houtkruis" van Koos van der Merwe, ook bekend as Prophet, het besluit om 'n populierhoutbalk in te span en 'n houtkruis op te rig. Die kruis is 3 m hoog en 1,4 m breed aan die arms. Volgens Cillie gedenk hulle hierdie jaar spesifiek vir Lloyd, en daar word beplan om volgende jaar nog kruise op te rig.
33 Persone van verskeie instansies het die verrigtinge bygewoon. Eregaste het ingesluit luitenant-kolonel Laetitia Wolmarans (tweede in bevel van die Infanterieskool), luitenant-kolonel Stephan Hendrico (offisier in bevel van die Oudtshoorn siekeboeg), raadslid Johan Fourie (namens die Oudtshoorn burgemeester) en mevrou Alida Calitz (eggenote van sersant-majoor Calitz) het die gedenkdiens bygewoon.
Volgens Wolmarans was dit vir haar 'n groot eer om die dag daar te wees en te sien hoe hierdie toegewyde veterane-familie die gesinne van die gevalle soldate en hul families ondersteun.
By die verrigtinge is die kruis onthul as 'n eerbetoon aan die gevalle soldate. Daarna is duiwe losgelaat as simbool van die SAWV se eie unieke gedenkdiens, met Proteas as die tema, wat deur eenhede in
verskeie dorpe regoor die land gehou word by gedenktekens en helde akkers om hul gevalle makkers te herdenk.
Na die verrigtinge is die nuwe komitee van die Spekboom-eenheid aangekondig. Ben Diedericks as voorsitter, Graham Vos as ondervoorsitter en Judy Vos as administratiewe dame is verkies. Gerrie Bouwer is nuut aangestelde voorsitter van die SAWV-Wes-Kaap, en Dudley Poulton as ondervoorsitter. Poulton het die hele pad van Gordonsbaai gekom om die diens by te woon.
Die SAWV fokus op die volgende aspekte: Ondersteuning
Erkenning
Herdenking
Nasiebou
Vir meer besonderhede en donasies, kontak Cillie per e-pos op pieter.cillie@ sawv.co.za of WhatsApp hom op 081 406 0466.