Herdenkingsparades vir afgestorwenes
Lede van die Memorable Order of Tin Hats (MOTH's) van die Tuinroete MOTH's Motorcycle Association (MMA) hou op Saterdag, 11 November, 'n Herdenkingsrit van George na Mosselbaai. Wêreldwyd word Herdenkingsdae op die 11de dag van die 11de maand om 11:00 gehou. In talle groot stede en dorpe word eer betoon aan gevalle soldate in die vorm van spesiale dienste of parades, wat op die naaste Sondag aan dié datum gehou word.
Vanjaar val die 11de November toevallig op die Saterdag. Die motorfietsgemeenskap het 'n ontbytrit, 'n massa motorfietsrit en 'n parade waar diegene van die omgewing, wat hul lewens tydens verskeie oorloë verloor het, vereer word. Die rit begin om 07:45 by die Outeniqua Shellhole op die hoek van Rijk Tulbagh en De Chevonne strate, George. Hulle arriveer om 08:30 by die Hartenbos Seefront waar die motorfietsryers 'n ligte ontbyt en koffie sal geniet. Teen 10:00 vertrek hulle na die Senotaaf by die Punt op Mosselbaai waar die parade om 11:00 sal begin.
Sondag, 12 November, vind die standaard parade plaas om Herdenkingsdag te gedenk. Dit staan ook bekend as Blommedag (Poppy Day), en in Amerika word dit Veteranedag genoem. Dit is vir die eerste keer waargeneem in 1919, maar tot 1945 was dit bekend as Wapenstilstanddag. Dit het
sedertdien 'n herdenking geword vir almal wat in ander oorloë ook gesterf het.
Dié parade is baie meer formeel en veterane en ander instansies woon die parades in formele drag by. Lede van die publiek is ook welkom.
By die twee parades sal daar op 'n gepaste tyd twee seinkanonne afgevuur word, wat die begin en einde van die twee minute se stilte aandui ter herdenking van die lewens wat verloor is tydens gewapende konflikte.
By beide parades sal daar ook 'n geleentheid wees vir enige persoon wat respek wil betoon deur óf 'n kruis, blom of krans te plaas.
"Dit is altyd 'n uitstekende geleentheid om ons jonger generasie te herinner aan die opofferings wat ons helde gemaak het en is die ideale geleentheid vir 'n gesinsuitstappie," het organiseerder, Anthony Van Tonder, by 'n vorige geleentheid gesê. Vir enige navrae kontak Athony van Tonder. (082 467 3365).