Slange sal nou al hoe meer voorkom
Na die winter en goeie reënseisoen word die dae warmer en dan raak meeste van ons slangsoorte weer baie aktief.
Die afgelope week het drie voorvalle, wat op sosiale media geplaas is, die aandag getrek. Al drie gevalle is op Sondag, 22 Oktober, waargeneem.
Die eerste was van 'n Kaapse kobra, wat op die Outeniqua Game Farm afgeneem is.
Die tweede slang was 'n pofadder wat op Klein-Brakrivier se strand deur Schalk Prinsloo afgeneem is. Die vermoede is dat dié slang met die vloedwater en opdrifsel afgekom het. Weg van sy natuurlike habitat, het hy/sy op die strand uitgeseil.
Mosselbaai brand-, redding- en rampbestuursdiens is geaktiveer om die slang te verwyder.
Eugene Norval het ook by Klein Brakstrand 'n skaapsteker met sy kamera vasgevang.
Lede van die publiek word daaraan herinner om nie slange self te probeer verwyder nie.
Ons vyf giftigste slange is:
Swart mamba (Dendroaspis polylepis) Die gif van dié tas die senustelsel aan. Die slang pik 'n paar keer na mekaar en die gif werk vinnig. Onmiddellike behandeling is nodig anders sterf die slagoffer weens verlamming en versmoring.
Die swart mamba is een van die dodelikste slange in die wêreld en is die langste giftige slang in Afrika. Indien 'n swart mamba teëgekom word moet daar stadig en versigtig agteruit beweeg word. Skielike beweging sal die slang vinnig en baie kere laat pik. Die slang kan teen 'n spoed van 20 km/h voortbeweeg. Pofadder (Bitis arietans of Bitis lachesis) Die gif het sitotoksiese uitwerkings en is een van die giftigste van al die adders. Daar word gesê dat ongeveer 100 mg genoeg is om 'n gesonde mens dood te maak, die dood tree dan in ná 24 uur. Die pofadder blaas sy lyf dikwels op voordat hy pik en blaas die lug dan vinnig met 'n harde sisof pofgeluid uit - vandaar sy volksnaam. Indien gesteur word, sal hy hard en aanhoudend sis, 'n verdedigende digte "S" posisie inneem, gereed om te pik.
Kaapse Kobra, Geelslang of Koperkapel (Naja nivea)
Soos in die geval van die swart mamba tas die Kaapse kobra se gif ook die senustelsel aan en onmiddellike behandeling is nodig anders sterf die slagoffer weens verlamming en versmoring.
Die slang se kleur wissel van geel tot geelbruin gevlek met donker kolle, tot 'n donker rooierige bruin. Die punt van die stert is swarterig. Jong slange het 'n donker keelband wat ligter word namate hulle volwasse raak.
Boomslang (Dispholidus typus)
Die boomslang se gif is uiters giftig en kan tot die dood lei. Dit is 'n hemotoksien. Dit beteken dat die gif die hemoglobien in die rooibloedselle aanval en vernietig, en só die bloed in die slagoffer vernietig. Boomslange is anders as baie ander slange in die sin dat hulle meestal seksueel dimorfies is; wyfies behou die bruingrys kleur van onvolwasse boomslange, maar mannetjies word 'n helder groen.
Rinkhals (Hemachatus haemachatus) Die gif is neurotoksies (senuvergiftend). Dit beteken dat die gif die vyand se senustelsel aantas. Neurotoksiese gif laat jou slaperig en deurmekaar voel.
Dit onderdruk ook asemhaling, weens verlamming van die diafragmaspiere. Die slang kan gif tot 2,4 m ver spoeg en maak 'n sisgeluid wanneer hy spoeg. Die gif verblind die vyand onmiddellik en kan permanente blindheid veroorsaak as dit nie dadelik uitgewas word nie.
Indien 'n slang jou pik, is dit belangrik om onmiddellik mediese hulp te soek. Beweeg so min as moontlik en bly kalm. Moenie die wond sny, suig, ys of salwe opsit nie. Moet ook nie elektriese skokke toepas nie.