AfriForum hou kursus vir operasionele spanleiers
AfriForum se Mosselbaai-tak het oor die naweek van 20 en 22 Oktober, 'n geslaagde operasionele spanleier-kursus vir die AfriForum plaas- en buurtwagte in die SuidKaap aangebied. Operasionele spanleiers en ander lede van AfriForum buurtwagte te Glentana, Groot-Brakrivier, Midbrak, Oudtshoorn en Herbertsdaleplaaswag het die opleiding meegemaak. Dié kursus volg op die inligtingspanleier kursus wat gedurende September 2023 deur die AfriForum se George-tak aangebied was. David Olivier, die veiligheidshoof van AfriForum se Suidstreek, het as instrukteur opgetree.
Die doel van die kursus was om die buurtwagte se operasionele spanleiers toe te rus met die nodige vaardighede om operasies in hul gebiede te kan bedryf. Onderwerpe soos ontplooiingsdrils, aanbied van operasionele orders, die werking van 'n gesamentlike operasiesentrum (GOS), gebeurlikheidsbeplanning en regsaspekte was behandel. Die kursus was afgesluit met 'n teoretiese assessering asook die praktiese aanbieding van operasionele orders waar 'n buurtwag ter ondersteuning van die polisie in 'n verwagte onlussituasie optree.
AfriForum beskou dit as uiters belangrik om hul buurt- en plaaswagte toe te rus vir die uitvoering van hul taak, nie net deur die buurtwagte van die nodige toerusting te voorsien nie, maar ook om goeie opleiding aan die lede te bied. Hierdie opleiding vind op drie vlakke plaas naamlik waar die buurtwaglede op vlak een in die basiese aspekte van onder andere patrollies, radio prosedures, regsaspekte, huis- en haardbeskerming, toneelhantering, gebiedsbeveiliging, en nog meer onderrig word. Hierdie opleiding vind hoofsaaklik aanlyn deur middel van Teams plaas.
Die volgende vlak van opleiding behels die opleiding van die leierelemente van die buurtwagte, hier word die buurtwag se operasieen inligting spanleiers deur middel van formele kursusse opgelei en toegerus om as leiers vir hul spanne op te tree.
Met vlak drie opleiding word meer gevorderde opleiding soos buurtwagleiers, protospan-lede en hommeltuig-vlieëniers aangebied.
AfriForum Mosselbaai-tak het tans twee studente op die hommeltuigvlieëniers kursus wat vanaf 23 tot 28 Oktober op Stellenbosch aangebied word, dit bring ons te staan op drie opgeleide vlieëniers. Die Mosselbaaitak het so pas 'n hommeltuig met dag- en nagsigvermoë aangekoop. Tot op hede het hulle van 'n privaat hommeltuig in die Glentana Buurtwag gebruik gemaak en die algehele vermoë is dus hiermee verdubbel.
AfriForum verbind hom daartoe om te alle tye saam met alle veiligheid instansies te werk en versoek alle inwoners van Mosselbaai om by die naaste buurtwag aan te sluit.