Rolspelers praat oor komende vakansieseisoen
Die Mosselbaai-munisipaliteit het vandeesweek sy jaarlikse beplanningsvergadering gehou waarby ‘n verskeidenheid rolspelers met die oog op die komende vakansieseisoen inspraak lewer.
Die vergadering is ‘n voorloper vir die munisipaliteit se seisoenmoniteringsvergadering. Tydens die somervakansie word dié vergadering daagliks gehou.
Tydens die beplanningsvergadering, wat deur die uitvoerende burgemeester, raadsheer
Dirk Kotzé, munisipale bestuurder, Colin Puren, en Joubert Coetzee, senior bestuurder van strategiese dienste, gelei is, was onder meer verteenwoordigers van belasting-betalersverenigings, Mosselbaai Toerisme, oord- en karavaanparkbestuurders, die SuidAfrikaanse Polisiediens, buurtwag- en gemeenskapspolisieforum-verteenwoordigers, direkteure en senior bestuurders van die Mosselbaai-munisipaliteit, asook burgemeesterskomiteelede.
Verskeie sake is geopper veral met betrekking tot die herstelwerk op strande ná die stormskade in September, so ook algemene veiligheid en reëls met betrekking tot gedrag op strande.
Wat betref die herstelwerk op strande, het die munisipaliteit bevestig dat verskeie konsultante aangestel is om al die strandtoegangtrappe en wandelpaaie wat beskadig is, te ondersoek en ‘n omvattende verslag op te stel. Die laaste verslae word teen Vrydag, 27 Oktober ingewag, waarna dit na versekeraars sal gaan vir goedkeuring sodat herstelwerk gedoen kan word.
Puren het egter genoem dat hoewel die herstel van skade prioriteit geniet, dit tans nie moontlik is om ‘n presiese tydperk te bevestig vir die voltooiing daarvan nie.
Daar was ook heelwat navrae aangaande die hantering van verkeersvloei op Louis Fourieweg gedurende die feesseisoen met betrekking tot die opgraderingsprojek. Keegan de Waal, hoofingenieur van die Wes-Kaapse departement van vervoer en openbare werke, het op versoek ‘n
Verskeie sake is geopper veral met betrekking tot die herstelwerk op strande ná die stormskade in September.
aanbieding in dié verband gedoen. Hy het tydens die vergadering bevestig dat tweerigtingverkeer deurlopend deur die feesseisoen op Louis Fourieweg gehandhaaf sal word en dat maandelikse opdaterings oor die vordering van projek voortaan deur die provinsiale departement beskikbaar gestel sal word.
Met die feesseisoen voor hande, was daar ook ‘n versoek dat ‘n gebeurlikheidskalender gesirkuleer word. Die portefeuljevoorsitter
vir korporatiewe dienste, raadslid Nickey le Roux, het aangekondig dat die Collab Citizen-munisipale slimfoontoepassing se jongste funksionaliteit onder meer ‘n direkte skakel insluit na Mosselbaai Toerisme se omvattende gebeurlikheidskalender, ‘n nuwigheid wat van nut vir inwoners en besoekers sal wees. Die Collab Citizentoepassing kan afgelaai word by Google Play Store, Apple App Store en Huawei AppGallery.