– wêreldwyd
Die Isuzu Ironman 70.3-byeenkoms, wat in 2022 vir die eerste keer op Mosselbaai gehou is, was 'n dawerende sukses. Nie net was inskrywings maande voor die byeenkoms uitverkoop nie, maar opnames ná die byeenkoms het getoon dat atlete Mosselbaai as een van die top drie gashere vir hierdie wêreldbekende kompetisie beskou.
Met 'n yslike 97.62% – ‘n totaal bereken nadat deelnemers 'n tevredenheidsvraelys voltooi het om hul ervaring in verskeie Ironman-lokale te beoordeel – was Mosselbaai met breukdele van 'n punt agter Port Macquarie in Australië (98.14%) en Chattanooga in die VSA (98.09%).
Dit is geen geringe prestasie vir 'n nuwe gasheerdorp nie, en dien as motivering vir almal wat betrokke is met die voorbereidings vir vanjaar se geleentheid op Sondag, 19 November. Die projekbestuurder van Ironman Events, Werner Smit, is verantwoordelik vir die organisasie en kan nie wag om vanjaar se Ironman-deelnemers weer eens te verwelkom nie.
“Duisende opgewonde atlete en hul ondersteuningspanne en gesinne het verlede jaar by ons aangesluit vir die eerste Ironman op Mosselbaai, en die groot skares het die strande en strate ingevaar om atlete op die groot dag te ondersteun,” sê Smit.
Hy voeg by dat, volgens die 2022-opname, 75.75% van die atlete aangedui het hulle beplan om terug te keer na Ironman 70.3 Mosselbaai. As dié ikoniese omgewing in ag geneem word, sal baie van dié besoekers waarskynlik hul Mosselbaai-verblyf ná wedloopdag te verleng, met 'n groot gros van vanjaar se deelnemers wat brand om meer van die dorp se unieke aanbiedinge te verken.
Dit is wat gebeur wanneer jou aanvanklike ervaring so onvergeetlik is dat dit eenvoudig herhaal moet word. Sommige van die indrukke wat in die opname gedeel is, sluit in:
Die uitdaging? Ek het daarvan gehou dat dit so taai was! Ek is LIEF vir die area en die plaaslike inwoners het regtig uit hul pad uit gegaan om dit vir ons aangenaam te maak. Hul ondersteuning het ons gedra deur beide die fiets- en die hardloop-seksies, waar die ondersteuning fenomenaal was. Mens kan sien dat Mosselbaai regtig oorgehaal was om ons te verwelkom en dit word opreg waardeer.
Ek was mal oor die skare se energie en ondersteuning. Verkeersbeheer was deurgaans ongelooflik. Die vrywilligers en Ironman-personeel was wonderlik. Oor die algemeen, 'n baie goeie ervaring.
Wat 'n atmosfeer, en so goed georganiseer! Die kommentator was puik en die swem was seker die beste ooit!
Die einde van byeenkomste soos dié is altyd ‘n hoogtepunt en die registrasie was ongelooflik. Die roete langs die see was 'n lekker verrassing en strate rondom die eindpunt was gevul met groot getalle ondersteuners.
Afgesien van blootstelling vir toerisme en ondersteuning van liefdadigheidssake, bied die Isuzu Ironman 70.3 Mosselbaai ook geleenthede vir gemeenskapsbetrokkenheid en opheffing deur vaardighede oor te dra aan talentvolle jong medewerkers van Mosselbaai en sy omstreke. Meer as 1 000 vrywilligers het hand bygesit by die 2022-geleentheid.
"Vrywilligers vorm 'n integrale deel van Ironman-byeenkomste en atlete van regoor die planeet beskou Suid-Afrikaanse vrywilligers as die heel beste ter wêreld," straal Smit, trots op die feit dat die menslike faktor net so goed vaar soos Mosselbaai se natuurlike skoonheid en tallose toeristetrekpleisters.
Besoek www.ironman.com/im703-mosselbay vir besonderhede oor registrasie, roetes en kategorieë, en om in te skryf. Skakel 044 691 2202 of klik op www.visitmosselbay. co.za om jou verblyf in Ikoniese Mosselbaai vas te maak.