Wapenstilstanddag herdenk
‘n Parade ter herdenking van Wapenstilstanddag (ook bekend as Poppy Day), wat die beëindiging van vyandige optrede tussen die Sentrale Magte (Duitsland, Oostenryk-Hongarye en Ottomaanse Statebond) en die Geallieerde Magte (Serbië, Rusland, Frankryk, Italië, Brittanje en die VSA) op 11 November 1918 herdenk, is op Sondag, 12 November, aangebied deur die Memorable Order of Tin Hats (MOTH). Die parade is georganiseer deur die plaaslike MOTH bomgat, Blaize Away.
Almal was dit eens dat die parade, wat goed bygewoon is, ‘n groot sukses was.
Die parade is bygewoon deur lede van MOTH van so vêr as Sabie asook lede van verskeie militêre veterane-organisasies, openbare diensorganisasies, siviele organisasies en die algemene publiek. Raadshere Anton Dellemijn en Niklaas Booisen het die munisipale raad van Mosselbaai verteenwoording. Raadsheer
Dellemijn het ook die gaste toegespreek en die belangrikheid van vrede beklemtoon.
Tydens die parade is die name van inwoners van Mosselbaai wat hulle lewens afgelê het in oorloë vanaf die Eerste Wêreldoorlog tot die konflik In Irak uitgelees. ‘n Besondere toevoeging tot die verrigtinge was die insluiting van seremoniële kanonvuur.
Verteenwoordigers van verskeie oganisisasies het kranse gelê tydens die parade, onder wie raadshere Anton Dellemijn en Niklaas Booisen.
Blaize Away bomgat bedank almal wat bygedra het tot die suksevolle aanbieding van die parade, asook almal wat die parade bygewoon het.
*Die amptelike naam van dié dag was in Brittanje van 1921 tot 1930 "Armistice Day" waarna dit na "Remembrance Day" verander is. Amerika het tot 1954 volgehou met "Armistice Day" waarna dit toe verander is na "Veterans Day".