Arende en klubs moet hande vat om getalle ‘n hupstoot te gee
Die afrigter van die Phangela Suidwestelike Distrikte (SWD) se Arenderugbyspan, Anton Moolman, kon daarin slaag om 'n wedstryd gereël te kry teen die balans van die DHL Westelike Provinsie (WP) se Stormers en dié wedstryd word vanmiddag om 17:00 op die hoërskool se veld op Hermanus beslis. Met die seisoen, wat eers in Februarie 2024 afskop, moet Moolman alles in die stryd werp om sy spelers doelgerig te hou en ook geleenthede skep vir sy spelers om aan wedstrydsituasies gewoond te raak.
"Dit is nie ideaal om so lank voor die seisoen begin die spelers net op die oefenveld besig te hou nie en daarom is dit van kardinale belang dat ons enige geleentheid moet gebruik om die spelers in situasies soos dié betrokke te kry. Dit sal ons as afrigtingspan ook help om die nodige assessering te kan doen sodat ons weet waar ons met elke speler staan.
"Daar is nog twee wedstryde waaraan ek werk sodat ons vóór en ná die Desember breek ook in wedstryde betrokke kan raak voor die seisoen uiteindelik in aanvang neem. Ander spanne soos die Pumas en Griekwaland-Wes volg dieselfde model om teen mekaar te speel omdat hulle ook uitgesluit is van 'n kompetisie soos die Verenigde Rugbykampioenskap (VRK) waar net die vier groot unies betrokke is," het Moolman gesê.
Aangenaam verras
Moolman was ook die afgelope Saterdag op Outeniqua Park teenwoordig waar die verskillende klubliga's se eindstryde beslis is en sê hy was aangenaam verras met die kwaliteit van rugby wat opgedis is. "Ek kry nie baie die geleentheid om klubspanne in aksie te sien nie omdat ons baie oorvleuel met mekaar, maar ek het die skouspel geniet en daar is spelers wat verseker aandag getrek het," het hy gesê.
Die breier sê dit was weer eens vir hom 'n openbaring oor hoe goed klubrugby ondersteun word. "Die klubstrukture is goed gevestig en die ondersteuning is van die beste. Dit het dalk tyd geword om gesprekke aan te knoop om te sien hoe ons mekaar kan bystaan sodat die klubs en provinsiale span met mekaar kan saamwerk," het hy gesê.
Moolman sê hy werk tans aan 'n plan, maar dit is nog nie behoorlik geformuleer nie.
Dit sal egter 'n goeie beginpunt wees as klubwedstryde as voorwedstryde vir die provinsiale span op dieselfde dag plaasvind sodat twee vlieë met een klap geslaan kan word. Met die goeie ondersteuning, wat veral by klubwedstryde gesien word, kan die provinsiale span dan ook terselfdertyd van dieselfde toeskouers "gebruik maak" om die ondersteuning vir die Arende te groei.
Met baie van die klubfasiliteite wat net 'n sekere aantal toeskouers kan hanteer, kan Outeniqua Park gebruik word om groter getalle te trek, wat 'n wen-wen situasie vir beide die klubs asook die Arende sal wees. Die Arende hoef ook nie aanspraak te maak op die hekinkomste nie en 'n 80/20 verdeling met die klubs wat die grootste gedeelte sal kry, behoort dit byval te vind indien hulle bereid is om in sulke gesprekke met mekaar betrokke te raak.
Vir Moolman en sy afrigtingspan kan so 'n ooreenkoms ook werk omdat hulle dan op sulke dae meer gereeld van die klubspelers in aksie sal sien om die diepte in die provinsie verder aan te vul en uit te bou.
Wanneer die nasionale kompetisie vir die provinsiale spanne afskop sal 'n maksimum van agt tuiswedstryde vir die Arende op Outeniqua Park wees. Dit behoort dus glad nie te moeilik te wees om klub- en provinsiale wedstryde te kombineer sodat dit op dieselfde dag beslis word en dit tot voordeel van almal sal wees.
Die wil moet egter daar wees om so 'n model bymekaar te trek en dit is dikwels waar goeie planne baie keer skipbreuk ly.