Herstelwerk reeds begin by strande
Reuse branders deur die springgety het verlede Woensdagmiddag, 15 November, veroorsaak dat die toegangstrappe na die strandgebied en bosse teen die sandwalle by Diasstrand, losgespoel en dit behoorlik soos 'n rommelhoop laat lyk het.
Na die vorige vlaag skade wat in September op die strande aangerig is, is hierdie weer eens ‘n groot kopseer met die feestyd net om die draai. Volgens ‘n ingeligte bron het die gemeenskap hulself glo ook kom help met van die hout en selfs stukke staal van die skeepswrakke, die Rosebud of die King Cenric, wat na die storm, óf oop- óf losgespoel het.
Die Mosselbaai-munisipaliteit en sy gekontrakteerde spanne het op Donderdag, 16 November, 'n omvattende strandskoonmaak-proses begin by Twee Kuilen, Diasstrand, De Bakke en Santos Strand om rommel te verwyder. Die rommel, wat na die onlangse vloede vanuit hoërliggende areas na die kusgebiede gespoel is, het op die strande opgehoop nadat sterk wind en golfaksie dit vanuit die see teruggedwing het. Spanne het die rommel, insluitend boomstompe, takke en stokke, na hopies verskuif waarvan sommige verwyder sal word, terwyl die res nader aan die duine sal bly om erosie te bestry.
Die munisipaliteit het in ‘n verdere verklaring oor die herstelwerk die volgende met die Mossel Bay Advertiser gedeel.
"Die munisipaliteit het ingenieursverslae bekom waarvan die laaste eers einde Oktober ontvang is. ‘n Versekeringseis is ingestel en soos dit met enige eis van bepaalde bedrae gaan, is assessore se insae nodig voor daar voortgegaan kan word. Die besoek van die assessor het eers op Dinsdag, 14 November, plaasgevind 'n dag voor die volgende skade aangerig is.
"In die meeste gevalle is openbare toegang tot strande beskadig wat houttrappe en kuswandelpaadjies insluit.
"Ter wille van publieke veiligheid het die munisipaliteit sekere openbare toegangspunte afgesper en geaffekteerde strande deurlopend gemonitor aangesien gevalle van hoë-golfaksie met tussenposes gedurende die afgelope tyd voorgekom het.
"Die Mosselbaai-munisipaliteit het onmiddellik na die stormsee-toestande op 16 September verskeie strukturele ingenieurs-konsultante aangestel om die skade se omvang te bepaal. 'n Volledige verslag moes saamgestel word voor daar met enige herstelwerk begin kon word. Die laaste verslae is aan die einde van Oktober 2023 ontvang, waarna assessore Mosselbaai verlede week op Dinsdag, 14 November, besoek het om die werkswyse vorentoe te bespreek.
"Dit kan bevestig word dat goedkeuring verleen is om van Maandag, 20 November 2023, met die dringende en noodsaaklike herstelwerk te begin. Die fokus van die werk wat verrig sal word, is veral gemik op strandtoegang om te verseker die strande is toeganklik vir die algemene publiek.
"Met die vakansie seisoen op hande, sal voorkeur gegee word aan die mees gewilde strande waar die skade die ergste was en deur die publiek besoek word.
Die strande ter sprake sluit in
Diaz, Danabaai (1ste en 2de strand), Boggomsbaai, Groot-Brak Eiland, Bayview, Kusweg (Tergniet), Glentana en ook Outeniqua Strand,
"Opvolgwerk by ander strande sal geprioritiseer word om die werk so vinnig as moontlik af te handel.
"Lede van die publiek word ingelig om bedag te wees aangesien kontrakteurs vandeesweek reeds ontplooi is om met die herstelwerk te begin. Op Woensdag, 22 November, was kontrakteurs reeds besig om die toegangsroetes by Diasstrand te herstel. As alles volgens plan verloop sal die werk met die aanvang van die feesseisoen voltooi wees.
"Die publiek word versoek om verdraagsaam te wees en enige afgesperde areas te vermy. Waar toegang tot sekere areas nog nie oopgestel is nie, moet die publiek eerder van alternatiewe en tydelike roetes gebruik maak tot die herstelwerk voltooi is."