Suidooster se Maurice kuier in Mosselbaai
Die Volkskerk van Afrika Mosselbaai-gemeente het op
18 Novemeber 'n spogtee as fondsinsameling gehou By dié geleentheid was daar meer as
280 mense teenwoordig.
Die gasspreker by dié geleentheid was Maurice Paige, immergewilde akteur in die Afrikaanse sepie Suidooster, wat elke week van Maandag tot Vrydag net voor die nuus om 19:00 op kykNET uitgesaai word. Paige wat ook 'n liggaamsbouer en oud-rugbyspeler is, het ook bekendheid verwerf in Gog' Helen (2012) en Barakat (2020). Die Spreeus en Pop, Lock 'n Roll en Suidooster het alles bygedra om van Maurice 'n huishoudelike naam te maak.
Die Ridgeview-skoolsaal was kleurvol verfraai met 27 tafels met koeke en natuurlik sout-en-soet-versnaperings. Maurice het by dié geleentheid sy wedervaringe gedeel waar hy as kind op Heidelberg groot geword het. Sy ouma was 'n sterk vrou in die gemeenskap met hoë Christelike en morele waardes, wat sy aan hulle as kinders oorgedra het.
Maurice se grootword jare was nie maklik nie en daarom wil hy veral jongmense inspireer en aanmoedig om die beste van hul lewens te maak ondanks moeilike omstandighede. Hy het ook 'n beroep op almal gedoen om die komende 16 dae veldtog van aktivisme teen vroue- en kindergeweld te gebruik om dit om te draai en dit te gebruik om dit vir 365 dae te doen. "Elke dag".
Eie program
Ter afsluiting het hy nuus gedeel dat 'n
nuwe avontuur sy loopbaan te beurt geval het. Een van sy drome was altyd om as 'n regisseur sy eie program te kan behartig. Hy het die geleentheid gekry om dié droom waar te maak en Die Kelners sal binnekort op e.tv gebeeldsend word.
Dié spesiale dag is afgesluit met ‘n fotosessie waar Maurice nie geskroom het om vir meer 300 foto's saam ondersteuners afgeneem te word nie. Sy nederigheid en geduld was uitstaande.
"Ons as die Volkskerk van Afrika wil Maurice weer eens hartlik bedank dat hy sy weg oop gesien het om deel te wees van ons fondsinsamelings funksie. Ons wens hom alle heil en seën toe met sy loopbaan. Die gemeente Volkskerk van Afrika wil ook elke persoon bedank wat dié besondere dag so suksesvol gemaak het," het ds Neil Smit van die Mosselbaai gemeente gesê.