MossJazz weer vol gepak
Die jaarlikse MossJazz-fees, wat by Santosstrand oor die afgelope naweek vanaf 23 tot 26 November aangebied is, het weer 'n groot aantal jazz-entoesiaste na Mosselbaai gelok.
Die Santoskaravaanpark het uit sy nate gebars met feesgangers wat met tente, karavane, en kampeerwaens die geleentheid nie kon misloop nie. Met pragtige weer die hele naweek was Santos strand se grasperk en sandstrand vol gepak.
Vryskutwerker van die Mossel Bay Advertiser, Dexter Brinkhuis, het by die geleentheid met een van die stigter-direkteure van Camissa Solutions, Clarence Ford, gesels.
"Camissa is 'n oorspronklike naam wat ons voorvaders vir Kaapstad gegee het. Die Koi-woord beteken 'plek van soetwater'. Musiek, kuns, kultuur, en die natuur gee waarde aan ons mense. Die vertonings is altyd naby 'n waterbron soos die see, riviere of damme," sê Ford. "Ons aktivisme handel oor 'n inklusiewe geskiedenis in 'n land waar 'n gedeelte van ons geskiedenis nie aangeteken is nie."
Die uitvoerende hoof, Lovetta Bolters, is 'n BCom in besigheidswetenskap-graduaat met uitgebreide ervaring van meer as 30 jaar in beide die openbare en private sektore.
Ford (uitvoerende vervaardiger) is 'n radioaanbieder en entrepreneur met meer as 20 jaar ondervinding in dié bedryf. Camissa Solutions voorsien deur 'n netwerk van professionele mense, diverse bemarkings-, media-, geleentheids-, strategiese, en kommunikasieoplossings op 'n sleutelklare
basis. Met 'n paar vertonings regoor die land, is die Plettenbergbaai-vertoning na Mosselbaai verskuif waar die munisipaliteit bewus is van die impak wat geleenthede op 'n dorps-ekonomie kan hê.
"Die keuse van Santos strand pas goed by die kultuur en aktivisme van ons mense," sê Ford. "Verwag meer in die toekoms en veral in 2024, veral vanaf Kuba en Brasilië." Ford sê dat meer internasionale name op die program sal verskyn."