‘Staat gooi balle in lug’, spekuleer
“Dit voel of die staat balle in die lug gooi en werk op spekulasie.”
Só het die prokureur, wat die 42-jarige onderwyser van Laerskool Park verteenwoordig, Maandag in die Mosselbaai-landdroshof gesê.
Beide die staat en die verdediging het betooghoofde vir ‘n aansoek om borgtog gelewer.
Die beskuldigde is op 20 September by die skool in hegtenis geneem en staar reeds 19 aanklagte van onder meer verkragting, seksuele aanranding en seksuele aanvoring (voorheen gereedmaking) in die gesig.
Die aanklagte spruit uit voorvalle wat na bewering tussen 2019 en 2020 by verskeie plekke op Mosselbaai gebeur het. Daar was aanvanklik twee slagoffers wat verklarings by die polisie afgelê maar nog 'n verklaring is intussen van 'n derde klaer geneem.
Skedule 6
Omdat hy van ‘n skedule 6 misdryf aangekla word, moet die verdediging buitengewone omstandighede bewys, hoekom borgtog aan hom toegestaan moet word.
Die verdediging het getuig dat die beskuldigde nog heeltyd sy samewerking gegee en het onder meer gesê dat daar ‘n verhouding tussen hom en tenminste een van die slagoffers was.
Die verdediging het aangevoer dat die dade dus met toestemming plaasgevind en dat dit eerder neerkom op statutêre verkragting as verkragting. Statutêre verkragting is wanneer kinders tussen die ouderdom van 12 en 16 toestemming tot seks gee.
Die verdediging het ook geargumenteer dat die beweerde dade meer as drie jaar gelede plaasgevind het en dat daar, naas een geleentheid in Desember 2021, nie weer kommunikasie tussen hom en enige van die drie slagoffers was nie.
“As hierdie hof borgtog toestaan en ernstige maatreëls in plek stel, sal my kliënt daarby hou. Elke keer as ek die staat oor die verkragtingsaanklagte uitvra het dit by seksuele aanvoring gedraai. Die staat se saak is swak. In hierdie stadium gaan my kliënt alles verloor. Hy gaan nie kan teruggaan werk toe nie. Verder weet ons die howe is baie vol en dat dit baie lank sal neem voordat die saak afgehandel word.”
Adresse
Die beskuldigde het twee adresse opgegee as moontlike plekke waar hy sal woon, sou borgtog aan hom toegestaan word.
Die staat sê egter die beskuldigde se woning op Mosselbaai is naby aan die wonings van die slagoffers terwyl daar ‘n minderjarige kind by die ander woning bly.
Advokaat Gerda Marx het tydens haar betooghoofde aan die hof gesê die sterkte van die staat se saak speel ‘n belangrike rol in die borgaansoek.
“Die feit dat die slagoffers die beweerde dade eers jare nadat dit gebeur aangemeld het, tel nie teen die staat se saak nie. Die hele kern van die saak is dat hierdie kinders nie ingestem het nie.”
Die ondersoekbeampte in die saak, ao Soretha van Zyl, het Maandag getuig dat daar ‘n proses van seksuele aanvoring plaasgevind het voordat seks plaasgevind het. Sy het egter gesê dat sy nie verder daarop kan uitbrei nie en dat ‘n kliniese forensiese sielkundige oor wat met die slagoffers se psige in die hele proses gebeur het, sal getuig.
Marx het aan die hof gesê die beskuldigde het sy godsdiens gebruik om die slagoffers te manipuleer.
Hy het glo ook aan ‘n slagoffer tydens ‘n ander geleentheid gesê dit is God se wil dat hulle in ‘n verhouding is.
Marx het gesê sy kry nie enige uitsonderlike omstandighede in die verdediging se saak oor hoekom die beskuldigde nie in aanhouding kan bly vir die tydperk van die verhoor nie.
“Die beskuldigde het self getuig dat hy toegang tot ‘n mediese verpleegster by die tronk het.”
Hy voer onder meer aan dat hy vir mediese redes borgtog moet kry wat hartprobleme en ‘n rugprobleem insluit.
Veiligheid
Marx het gesê die publiek se veiligheid moet ook in ag geneem word. “Hy is ‘n gevaar vir kinders. Hy is ‘n gevaar vir hierdie getuies. Die hof het gehoor hulle sal nie uit hulle huise wil gaan as hy borgtog kry nie.
“Hulle is bang. Die klaers ontvang berading en terapie. Ons wil hê hulle moet veilig voel en wil hê hulle moet by die verhoor getuig. As die beskuldigde met hulle kontak maak, is daar 'n kans dat hulle nie sal getuig nie.”
Sy het ook gesê die beskuldigde het voorheen getuig dat hy selfdood idees gehad het. “Hy het selfdood gedagtes gehad vir probleme selfs kleiner as hierdie een.”
Die verdediging het gesê indien die beskuldigde wil selfdood pleeg hy dit in die tronk ook kan doen. Van Zyl het hierop tydens haar getuienis gesê dat indien korrektiewe amptenare hulle werk doen, aangehoudenes nie sekere goed soos skoenveters by hulle mag hou nie.
Marx het dit aan die hof gestel dat daar geen uitsonderlike omstandighede deur die verdediging voor die hof geplaas is nie.
“Die beskuldigde staan nie tereg op een of twee aanklagte nie. Daar is tans 19 aanklagte voor die hof. Die vonnisse van toepassing, en daar is ‘n paar, is lewenslange gevangenisstraf.”
Die saak is uitgestel tot 11 Desember vir uitspraak in die borgaansoek.
*