Onderwyser hoor Maandag of borgaansoek sal slaag
Die 43-jarige onderwyser van Laerskool Park, wat sedert 20 September in hegtenis is op meer as 19 aanklagte van onder meer verkragting, seksuele aanranding en seksuele aanvoring (voorheen gereedmaking) sal Maandag hoor of sy borgaansoek geslaag het.
Die verdagte se borgaansoek sloer reeds etlike weke in die Mosselbaai-landdroshof.
Beurtkrag en 'n oorvol hofrol, het bygedra tot die vertraging van sy borgaansoek.
Omdat hy van 'n skedule 6 misdryf aangekla word en die aanklagte teen hom baie ernstig is, moet die verdagte aan die hof buitengewone omstandighede bewys hoekom borgtog aan hom toegestaan moet word.
Die beweerde dade het tussen 2019 en 2020 by verskeie plekke op Mosselbaai plaasgevind.
Die staat beweer dat die slagoffers leerders in die verdagte se graad 7-registerklas was.
Die verdagte voer aan dat hy tyd met sy gesin wil spandeer, 'n verskeidenheid gesondheidsprobleme het en sedert sy inhegtenisname sy samewerking gegee het en borgtog dus aan hom toegestaan moet word.
Selfdood-risiko
Advokaat Gerda Marx vir die staat staan egter sy borgaansoek teen omdat die staat aanvoer dat hy dalk met die slagoffers in kontak sal kom, sy woning naby hulle woning is en hy 'n selfdood-risiko is.
Uitspraak in die borgaansoek sal Maandagoggend gelewer word. Indien borgtog geweier word, sal die verdagte in aanhouding in George bly vir die tydperk van sy verhoor.
Nadat die borguitspraak gelewer is sal die saak uitgestel word vir pleit.
Die verdagte kan dan of 'n skuld-enpleitooreenkoms met die staat aangaan. Indien hy skuldig pleit en nie die hof se tyd met 'n verhoor mors nie, sal die hof dit as versagtende omstandighede in ag neem. 'n Pleitooreenkoms word vinniger afgehandel. Indien die verdagte onskuldig pleit op sekere of al die aanklagte teen hom sal die saak op verhoor gaan. Dit kan etlike maande duur. Tydens 'n verhoor kry alle partye die geleentheid om te getuig en beide die staat en die verdediging roep getuies om oor die meriete van die saak te getuig. Die staat het reeds tydens die borgaansoek aangevoer dat 'n kliniese forensiese sielkundige vir die staat sal getuig om aan die hof die aanvoringproses te verduidelik. Die staat voer aan dat die seksdade nie met toestemming gegee is nie juis omdat daar na bewering seksuele aanvoring (gereedmaking) plaasgevind het.