Kenani-paartjie se pragtige troue
Henry Hans Pienaar (85) en Sonja Brenda Steyn (65) het op 1 Desember by die ACVV Kenani Diensentrum vir senior burgers getrou.
Hulle is albei Kenani-inwoners en het mekaar daar ontmoet.
Sonja het beeldskoon gelyk in 'n vloeiende, langmou, ligte pienk rok met fyn silwer strepe. Haar elegante, hoëhaksandale het perfek by die rok gepas.
Sy het 'n klein, eenvoudig ruiker gehad en haar hare was met blomme versier. Sy het pêreloorbelle gedra en pêrels om haar nek.
Na die troue by Kenani het die paartjie 'n fotosessie op die strand gehad.
'n Kenani-woordvoerder het gesê: "Vriendskapsbande word gesmee tussen mede inwoners hier by Kenani op ‘n daaglikse basis. Elke persoon het die behoefte aan liefde, eie identiteit, betekenis, omgee en aanvaarding. Psalm 16:5-6 lees: 'Here, U is my lewe, U sorg vir my. Wat ek ontvang, kom alles van U af. ‘n Pragtige deel is vir my afgemeet. Ja, wat ek ontvang het, is vir my mooi.'
Vriendskapsband
"Dit beskryf die mooi vriendskapsband tussen Henry en Sonja, wat dieper ontwikkel het tydens hul samesyn en waardevolle gesprekke.
"ACVV Kenani het die troue vir hulle gereël en Sonja se huismaats waar sy woonagtig was, Huis 9, het vir hulle as geskenk ‘n aand bespreek by 'n hotel in Hartenbos.
"Hierdie familiekring en vriende wens hul alle liefde en voorspoed toe op hierdie nuwe lewenspad wat hul saam gaan wandel in liefde en omgee."
Gemini Model and Talent Agency het foto's gratis vir die paartjie geneem en die agentskap se twee top modelle, Desiré Jooste en Emmie Taute Benn, het ook die paartjie ondersteun met die foto's en hulle gewys hoe om te poseer vir die foto's.