Omstrede Steve is al deur die meule, maar hy bly ‘n ‘entertainer’
Op 59-jarige ouderdom is die omstrede Steve Hofmeyr al deur die meule, maar as daar een ding is wat soos 'n paal bo water staan, is dit dat hy 'n entertainer sonder weerga is. Waar Hofmeyr hom ook al bevind sal daar altyd twee kampe wees. Óf jy hou van hom óf jy hou nie van hom nie.
Dis hoe dit is, met Steve!
Hofmeyr moes veral die laaste paar jaar reeds verskeie struikelblokke oorkom weens sy polities-aweregse uitsprake en sy passievolle verdediging van die Afrikaanse taal.
Die feit dat hy al in 'n fisieke onderonsie met 'n joernalis oor sy skoene was, 'n koppie tee in die gesig van 'n destydse Huisgenoot redaktrise gegooi het, het natuurlik nie baie gehelp om hom as 'n gunsteling onder die media te vestig nie. Groot borgskappe het hom ook al die rug gekeer. Juis oor sy soms impulsiewe reaksies soos om 'n dekodeerder aan die brand te steek, maar juis daarin lê Hofmeyr se briljantheid. Dis asof hy daarin gedy wanneer die blok begin warm raak terwyl sy geharde ondersteuners net meer toegewyd raak om hom as kunstenaar te ondersteun.
Stemmigheid en waardering
Die afgelope Donderdagaand het Hofmeyr by De Dekke op Groot-Brakrivier weer groot byval gevind toe hy sy nou reeds bekende "Tribute to Neil Diamond" opgevoer het. Opmerklik was die ligte glans van grysheid van haar van die gehoor, wat verklap het dis nie meer jou normale doefdoef hedendaagse selfoondraende jeug, wat in die voorste gestoeltes gesit het nie. Daar was 'n stemmigheid en waardering vir 'n kunstenaar, wat weet hoe om die emosie van sy gehoor vas te vang en op 'n nostalgiese reis mee te sleur.
Die "gesprek" wat hy met twee buitelanders gevoer het om die storie van Diamond te vertel, was iets wat baie goed gechoreografeer was ondanks die feit dat die beeld soms op die televisieskerms agter hom weggeraak het. So verdiep was Hofmeyr in die "gesprek" dat hy dit nie eens agtergekom het nie. Dit was boonop interessant genoeg dat selfs geharde Diamond-ondersteuners nog meer van die oud-hoërskoolmaat van Barbra Streisand te wete gekom het.
Behalwe vir Hofmeyr se eie passievolle vertolkings van Diamond se grootste treffers, het sy "duet" van You don't bring me flowers (Vroeger bracht je bloemen) met die Belgiese modelmooie Dana Winner in Vlaams, natuurlik 'n ekstra dimensie aan dié vertoning gelewer.
Die oud-Springbok losvoorspeler en deesdae eienaar van De Dekke, Anton Leonard, sê dit was 'n ongelooflike aand. "Het ons dit reggekry om Steve vir twee aande te kon laat optree, sou beide aande uitverkoop gewees het. Ons moes ekstra voorsiening en plek inruim om almal te akkommodeer. Met sy optrede was die plek reeds twee weke voor die optrede uitbespreek. Op die aand van sy optrede het ons 462 mense in die gehoor gehad met 'n verdere 300 wat op 'n waglys geplaas was. 'n Tweede vertoning sou ideaal gewees het," het hy gesê.
Dis hoe dit was, met Steve!