Geliefde Jannie du Toit hier in Desember
Die geliefde en bekroonde sanger en liedjieskrywer, Jannie du Toit, is op 19 Desember op Mosselbaai.
Du Toit tesame met Susan Mouton op die tjello en Chanie Jonker op die klavier en trekklavier is om 19:00 by die Diaz Museum in die vertoning Bonjour Monsieur Brel te sien.
Kaartjies beloop R150 vooraf en R170 op die aand. 'n Persentasie van die opbrengs uit die vertoning gaan aan Santos Haven Retirement Village.
Vir besprekings kontak Gaby Drews op 084 251 0204 of Willie Claassen op 082 715 9384.
Behalwe vir dié geleentheid op Mosselbaai, het Du Toit 'n opwindende jaar gehad.
Du Toit, wat sy eerste professionele verhoogoptrede in 1971 gehad het en in 1979 bekendheid verwerf het, is vanjaar tydens Pretoria FM se gesogte Aitsa Afrikaanse Musiektoekennings vereer vir sy lewenslange bydrae tot die plaaslike musiekbedryf.
“Wat ’n eer en aanmoediging vir die pad vorentoe,” sê hy oor hierdie besonderse toekenning wat hom te beurt geval het.
Gedurende Oktober het hy aan twee kunstefeeste deelgeneem, naamlik Aardklop, met sy splinternuwe produksie, Margaretastraat en die Woordfees, met Die Maan deur ’n gaatjie in die nag.
In Margaretastraat vertel hy die storie van die legendariese liedjieaande van 1981 en 1982 by sy huis, Margaretastraat 28, in Pretoria. In Die Maan deur ‘n gaatjie in die nag stel Jannie die gehoor bekend aan die liedjies van Marie Tredoux, legende van Jacobsbaai, wat op 94 steeds liedjies produseer.
Benewens ‘n reeks Kerskonserte in November, sluit hy die jaar se optredes af met 17 konserte gedurende sy jaarlikse Kaap-toer in Desember.