Desmond Share verdagte in hof
'n Dertigjarige man, Shadreck Mhetu wat in verband met die moord op 'n sakeman van Hartenbos, Desmond Share (53) in Augustus in hegtenis geneem is, het die afgelope week in die Mosselbaailanddroshof verskyn. Mhetu was van voorneme om vir borgtog aansoek te doen, maar omdat daar nie 'n tolk beskikbaar was nie, is die saak weer eens uitgestel tot 15 Januarie. Hy bly in aanhouding.
Share, 'n plaaslike sakeman, se liggaam is op Saterdag, 5 Augustus, tussen bosse naby Albertinia gevind, nadat hy vir dae lank vermis was. Sy bakkie is gesteel en is dié etlike dae ná sy moord op Ficksburg naby die grens van Lesotho gevind.
Die oorsaak van Share se dood is nog nie aan die media bekend gemaak nie, maar hy het ná wat verneem word veelvuldige beserings opgedoen.
Geld is ook uit sy bankrekening onttrek. Mhetu is kort ná die voorval in hegtenis geneem in Du Noon in Kaapstad.
Gemeenskapslede het ook by die hof bymekaar gekom om te vra dat borgtog
geweier moet word.
Mhetu staar aanklagte van moord, ontvoering en kaping in die gesig.
Twee mans wat destyds naby die grens in Share se bakkie gevind is, is in hegtenis geneem, maar word nie met die moord verbind nie.
Nóg 'n lasbrief is op 12 Desember deur die Mosselbaai-landdroshof uitgereik vir die inhegtenisname van Danzel Talent Alkulethi, ook bekend as Akwiriano, wat glo ook met die verdwyning van Share verbind word. Alkulethi is oorspronklik van Zimbabwe.
Nóg twee verdagtes wat met die moord op Share verbind kan word, Shown Gondo (31) en sy broer, Akim Gondo (25), ook Zimbabwiers, is steeds op vrye voet.