Christo hou die fort met Louis wat sy slag op Mauritius wys
Op dié projek werk ons ook baie nou saam met prinses Charlene van Monaco en haar SA Stigting.
Vir die eerste keer in nege jaar kon die beroepsgholfspeler en Mosselbaaier in murg en been, Louis Oosthuizen, nie die afgelope Saterdag aan sy eie Welwillendheid Stigting (Foundation57) se fondsinsamelingstoernooi op die skilderagtige Pinnacle Point landgoed, deelneem nie. Oosthuizen het weens verpligtinge in Mauritius as mede-ontwerper van Heritage La Réserve Links-baan aan die Mauritius Ope op dié baan deelgeneem, wat hy ook gewen het. Dié Welwillendheidstoernooi word jaarliks aangebied en dien as die hooffondsinsamelingsveldtog vir Foundation57 waarby begunstigdes asook verskeie ander gemeenskapsprojekte en nie-winsgewende organisasies baat vind.
Oor die jare het dié toernooi in gewildheid toegeneem en deesdae is die beskikbare plekke reeds maande voor die tyd gevul. Bekende oudsportmanne soos die oud-Springbokke Bakkies Botha, Henry Honiball, Pierre Spies en Werner Greeff het vanjaar deelgeneem. Die bekende voormalige Protea-broers, Albie en Morné Morkel, was ook in aksie, terwyl verskeie Mosselbaai-besighede die spelers op die baan met verversings bederf het.
Die Iconic Mossel Bay-inisiatief skakel ook jaarliks by dié toernooi in waar die burgemeester, raadsheer Dirk Kotzé, ook die verrigtinge bygewoon het. 'n Dokumentêre program sal ook vroeg in die nuwe jaar deur SuperSport oor die toernooi uitgesaai word.
Verskeie jong seuns en meisies waarvan sommige al deur die hande van Oosthuizen se Junior Gholf Akademie is, was ook in aksie.
Lamprecht neem leisels
In die afwesigheid van Oosthuizen, het die voormalige Akademie lid, Christo Lamprecht jnr van George, die leisels oorgeneem en saam met sy speelmaat, Joe van der Berg, die beterbal stablefordkompetisie van die voorkeur-bofhou gewen. Lamprecht het natuurlik vanjaar 'n groot opskudding veroorsaak toe hy ná die eerste ronde van die Britse Ope op die Royal Liverpool-baan in Hoylake ná die eerste ronde in die gesamentlike eerste posisie was. Soos nog 'n voormalige Akademie lid, Mosselbaaier Aldrich Potgieter in 2022, het Lamprecht vanjaar vir die Britse Ope gekwalifiseer ná hy die Britse Amateurtitel ingeoes het.
Lamprecht het boonop vanjaar die eerste Suid-Afrikaner geword om die nommer 1-posisie op die wêreldranglys vir amateurs in te neem. As 'n student aan Georgia Tech in Amerika, was daar ook verlede week 'n Amerikaanse televisiemaatskappy van die PGA, wat 'n volledige program oor Lamprecht in en om Mosselbaai én Pinnacle Point kom afneem het vir uitsending eksklusief in Amerika oor dié innemende jong man.
Volgens Petrie Cronjé, hoofuitvoerende beampte (HUB) van Foundation57, is daar vier begunstigdes, wat almal baat vind by die werksaamhede en fondsinsamelingsprojekte, wat as die saambreel-organisasie gesien kan word. "By die akademie, oftewel Academy57, is daar sowat 40 seuns en dogters vanuit die Suid-Kaap waarvoor geleenthede geskep word om hul talent ten volle te ontgin en te verbeter. Behalwe vir Potgieter en Lamprecht, het ons ook al beroepspelers soos Martin Vorster en Jordan Duminy opgelewer. Die Akademie het ook 'n Ontwikkelingsarm waar spelers vanuit die gemeenskappe geïdentifiseer word en weekliks word gratis afrigting aan hulle gegee," het hy gesê.
Die ander begunstigdes is Kids with Cancer waar die nasionale kankerorganisasie Cupcakes of Hope maandeliks deur Foundation57 finansieel ondersteun word terwyl die Leolan Academy ook maandeliks ondersteun word. "Daar is 50 kinders betrokke met spesiale behoeftes ten opsigte van autisme en downsindroom waarna Leolan daagliks omsien," het Cronjé gesê.
"Die vierde begunstigde is die iPapa57voedingsprogram waar daar op 'n daaglikse basis kinders van binne ons gemeenskappe gevoed word. Op dié projek werk ons ook baie nou saam met prinses Charlene van Monaco en haar SA Stigting waar ons fondsinsamelings doen om veral die hongersnood onder minderjarige kinders te beveg. Dié projek word genoem #Feedtogether," het Cronjé mee afgesluit.