SWD Arende lyk lus vir hardloop
Die rugbyspan van die Phangela Suidwestelike Distrikte (SWD) se Arende, het die afgelope Saterdag op die skilderagtige Saasveld-veld met aanskoulike hardlooprugby daarin geslaag om die Varsitybeker-span van NMU met 55-12 te oorrompel ná die Arende met die rustyd met 19-12 voorgeloop het. Die ses drieë wat deur die wenspan ná lemoentyd in die tweede helfte gedruk is, het 'n hele paar langafstand-pogings ingesluit.
Die enigste negatief oor dié oefenwedstryd is dat die telling heelwat hoër kon gewees het. In 'n hele paar bewegings het oorywerigheid daartoe gelei dat van die Arende skoon onder hul spanmaats uitgehardloop het en dan was die ondersteuning nie altyd daar om bewegings verder te voer nie. Dit is egter iets waaraan gewerk kan word, maar dit was duidelik dat die agterspelers lus is vir hardloop. Van die nege drieë wat teen die studente gedruk is, is sewe deur die Arende se agterspelers in vyfpunters omskep.
Ná die lang rusperiode oor die afgelope feesseisoen was dit ook verblydend om te sien daar is verseker nie laat slaplê met die oefenprogramme, wat aan elkeen van die spelers gegee is voor hulle na hul families is nie. Die wedstryd teen die studente is in 'n hoë tempo beslis en dit was eerder die studente, wat soms gelyk het of hulle rede gesoek het om asem te skep.
Heeltemal tevrede
Zane Kirchner, nuwe afrigter van die Arende, was soos sy kaptein, Janneman Stander, heeltemal tevrede met die vertoning teen NMU. "Ons wou veral die jonger spelers kans gee om ook in wedstrydsituasies betrokke te raak en ek is heel tevrede met wat ek gesien het. Daar is hier en daar dingetjies waaraan gewerk kan word, maar in die algemeen is ek heel tevrede," het Kirschner gesê.
Volgens Stander, wat eers in die tweede helfte sy verskyning gemaak het, het die jonger spelers goed deurgekom en dit was 'n plesier om hulle op volle vaart in aksie te sien. "Hulle het verseker die geleenthede aangegryp en dit was goed om hulle bietjie vrye teuels te gegee het," het hy gesê. Wat Stander egter nagelaat het om te sê is dat met sy toetrede tot dié wedstryd, was daar dadelik bietjie meer struktuur te bespeur. 'n Duidelike bewys dat sy teenwoordigheid en leiersrol 'n groot invloed op die jonger spelers het.
Kirchner se voorganger, Anton Moolman, het ook dié wedstryd slegs as 'n waarnemer bygewoon, maar was ook heel tevrede met die spelers se vertoning. "Ek is bly dat dinge goed afgeloop het. Ons het hard gewerk om al die stelsels in plek te kry en Zane kan nou met 'n geruste hart voortgaan om sy eie stempel af te druk met die verdere ontwikkeling van die span," het Moolman gesê.
Moolman het gister reeds in sy nuwe pos in Stellenbosch die leisels opgeneem waar hy voortaan by die UXI-instituut met spelers in die ouderdomsgroep 18 tot 21 sal werk waar daar nie net op rugby gefokus sal word nie, maar ook op die akademiese kant.
‘Hulle het verseker die geleenthede aangegryp en dit was goed om hulle bietjie vrye teuels te gegee het.’
Olifante op Plett
Die Arende se volgende wedstryd is op 24 Februarie wanneer die Oostelike Provinsie Olifante op Plettenbergbaai ook in 'n vriendskaplike kragmeting die stryd aangesê word ter voorbereiding van die SA Beker-kompetisie, wat op 23 Maart op Outeniqua Park teen Pumas afskop.
Vir die Arende het Rosco Syster (2), Jandré Grobler (2), Jade Stoffels, Mpho Ntsane, Clive Kruger, Janneman Stander en Keano Hendricks drieë teen die studente gedruk. Josh Vermeulen het met drie doelskoppe geslaag terwyl Stoffels en Mario Weich ook elkeen een oorgeklits het.