Nou gaan ons heel groen
Koos van Vuuren, Groot-Brakrivier:
Vir baie jare reeds is ek 'n gelukkige, en baie bevoorregte inwoner van ons pragtige dorp!
Ten einde my waardering daarvoor te toon, het ek die afgelope dae 78 (plus nog 'n klompie ekstra) spekbome aangeplant om op my laat ouderdom ook 'n klein bydrae te maak tot die redding van ons planeet.
Afgesien van bogenoemde rede, doen ek dit ook graag om ons plaaslike raad te ondersteun in hul klaarblyklike projek om nou voluit GROEN te gaan? Graag verwys ek hier na meegaande foto's van straattekens, wat geheel in natuurlike plantegroei in groen getooi is.
Foto 1 vertoon 'n stop-teken (soek en jy sal vind). Foto 2 nog 'n waarskuwingsteken, wat behoorlik wegkruip, tot jy reg langs die teken kom - met in die agtergrond, 'n teken wat alles moontlik doen om nie ook in groen newels weg te kruip nie. Foto 3 vertoon 'n "boom" wat op die oog af lyk soos 'n paal. Ons wag in groot spanning vir die kitsaangeplante boom om uit te loop, sodat ons kan sien watse pragtige boom ons straat in die toekoms gaan versier!
Genoemde foto's is geneem aan onderkant
van die gevaarlike draai in Voorbrugweg, Groot Brak.
Kommentaar van Mosselbaai-munisipaliteit: Die Mosselbaai-munisipaliteit se parkeafdeling is verantwoordelik om sypaadjies oop gesnoei en begaanbaar vir die publiek te hou. Die huidige kapasiteit sluit nie die gereelde oopsnoei en skoon hou van padverkeerstekens in nie. Die munisipaliteit reageer op versoeke om padtekens oop te sny soos dit ontvang word en koste-effektief binne die afdeling se werkskedule afgehandel kan word.
Lede van die publiek word aangemoedig om enige diensleweringskwessies te rapporteer by 044 606 5000 of stuur ‘n e-pos, met foto’s of videos, na admin@ mosselbay.gov.za. E-posse wat hierheen gestuur word, ontvang ‘n ontvangserkenning en ‘n verwysingsnommer word aan die skrywer gestuur wat gebruik kan word in die opvolg van aanmeldings. Die publiek word ook herinner aan die gebruikersvriendelike munisipale slimfoontoepassing, Collab Citizen wat die aanmelding van diensleweringskwessies bespoedig. Die Collab Citizen-toepassing kan afgelaai word by Apple App Store, Huawei AppGallery en Google Play Store.