Wêreldrekordpoging kom nader
Die tyd vir Pediatric Care Africa (PCA) se poging tot 'n wêreldrekordmotorfietsrit is om die draai.
Dié nie-winsgewende organisasie vra alle motorfietsryer in die omgewing om op Saterdag, 24 Februarie, hul bromponies op te saal en by dié geleentheid aan te sluit.
Die stigter van PCA, dr André Hattingh, het op Sondag, 11 Februarie uit Witrivier, Mpumalanga vertrek op sy vyfde 7 000km Ride for a Child-motorfietsrit - die wêreldrekordpoging, onder die vaandel van Ride for a Child, sal hierby aansluit; 'n eerste vir dié ritte.
PCA is 'n organisasie wat mediese hulp, van doktersbesoeke tot operasies, aan behoeftige kinders voorsien.
Dr Hattingh maak op 23 Februarie sy opwagting op Hartenbos en oornag hier voor die groot dag aanbreek.
Op 24 Februarie versoek PCA alle motorfietsklubs, motorfietsorganisasies en motorfietsryers in die Wes-Kaap, Oos-Kaap en die res van Suid-Afrika om by dr Hattingh aan te sluit vir dié beplande massiewe wêreldrekordpoging, wat plaasvind van voor die Caltex Mentors Plaza by Jeffreysbaai op die N2 na Stormsrivier.
Dit sal 50km verder by die Mentors Country Estate op Jeffreysbaai eindig.
"Om dié rekord erken te kry, het ons 'n minimum van 4 500 motorfietse nodig om as een groep in formasie vir 50km te ry. Ons sal ons rekordpoging formeel by RecordSetters in die VSA indien," sê Hattingh.
Daar is 'n tweeledige benadering met motorfiets-groepe, wat die ontmoetingspunt vanaf beide die Weste en die Ooste op die N2 nader. Westelike groepe sal Jeffreysbaai vanaf Kaapstad/George op die N2 nader waar die eerste groep om 06:00 op die N2-hoofweg naby die N2 Sasol vulstasie in George sal vertrek. Motorfietsryers wat van Hartenbos af wil saamry, sal dus vroeg hier moet vertrek.
Hierdie westelike optog sal aansluit by ryers wat van Oudtshoorn en verder, Knysna, Plettenbergbaai en ander dele van
Suid-Afrika kom en die idee is dat dié groep die motorfietsryers wat uit die Ooste kom, op die N2 ongeveer 50km voor die Caltex Mentors Plaza op die N2 in die rigting van George ontmoet, waar die werklike amptelike wêreldrekordpoging sal begin.
Die volledige ryplan is by www. pediatriccareafrica beskikbaar.
Kontak vir Mandy (072 034 0544) of die PCA kantoor by info@pediatriccareafrica.org of 076 229 5663, oor hoe om aan hierdie mega-geleentheid deel te neem. Besoek ook die webwerf by www.pediatriccareafrica vir volle besonderhede en die Quicket skakel vir aanlynbetalings. Kostes beloop R100 per motorfietsryer en R50 per passasier.