Sages besoek Boggomsbaai
Wanneer die Suid-Kaap Sages Boggomsbaai besoek, haal die Boggomsbaaiers behoorlik die voete van die pedale en probeer alles om die dag so lekker as moontlik te maak vir al die besoekers. So was dit dan ook toe 48 spelers kom aanmeld het op Donderdag, 22 Februarie.
Die heerlike ontbyt, wat Hannah Roux vir almal voorgesit het, het behoorlik die weg gebaan vir 'n lekker dag van gemoedelike samesyn wat almal terdeë geniet het. Ou vriendskappe word weer eens gekoester en nuwes opnuut gevorm!
Daar word darem ook gholf gespeel. Die formaat vir die dag was 'n Vierbal-Samespel met die beste twee se Stablefordtellings wat op elke putjie getel het. So het spelers van verskillende klubs die kans gekry om in die formaat saam met mekaar 'n span te vorm en mee te ding.
Uitslae
Die volgende vierballe het die beste vertoon.
1. Grove Koch en Paul de Villiers (Riversdal), Graham Dougall en Danie Terblanche (Mosselbaai) 101
2. Cassie Swanepoel en Marius Loubser (Boggomsbaai), Wessel de Bruyn en Branko Celica (Stilbaai) 100
3. Johan Muller en Fanie Wessels(B), Bennie Geldenhuys en Tony Muller (M) 98
4. Denzil Geldenhuys en Trevor Hendricks (R), Martin Speelman (M) en Peter Fillies (B) 96
5. Wessel Oosthuizen en Johan Leonard (B), Gert Pieterse (M) en Cassie Swanepoel (B, spookmaat) 94
6. Andries en Toy van Schalkwyk (B), Stoffel en Breggie Maritz (M) 92
Naaste aan die penne was Andries van Schalkwyk (B) op 9/18 en Julyan Bruyns (B) op 6/15. Peter Fillies, Andries van Schalkwyk, Tony Muller en André Beukes (B) het spogtwees behaal.
Dankie
Die dag is ekstra spesiaal gemaak deur Agri-Mosselbaai (SSK) wat die wenners se pryse geborg het. Baie van die spelers wat aan die Sagesdag kom deelneem het, is huidiglik lede van SSK en omdat so baie van die Sagesspelers pensioenarisse is, ook oudlede. Annelie van Wyk, senior bestuurder bemarking en kommunikasie van SSK, en Morné van Rensburg, bestuurder van Agri-Mosselbaai, word bedank vir hulle bydrae om hierdie lekker dag verder op te vrolik. 'n Groot dankie gaan ook aan die ander borge vir die pryse vir naaste aan die penne, die Kansatrekking en dan ook aan die Boggomsbaai Gholfklub vir die voorbereiding en beskikbaarstelling van die baan vir dié dag.
Die Sud-Kaap Sages se volgende bymekaarkoms is op 11 Maart op Mosselbaai wanneer die Suid-Kaap en Outeniekwa kragte meet om die wenner van die Stigtersbeker te bepaal.