VLV Voëlvlei en Herbertsdale kuier
Die lede van die twee VLV-takke, Voëlvlei en Herbertsdale, saam met ‘n groot aantal belangstellende gaste, het by Februarie se byeenkoms inligting ontvang oor die beheer en behandeling van kroniese pyn.
Dr Adriaan Liebenberg, neurochirurg en hoof-uitvoerende beampte (HUB) van 18 pynklinieke regoor Suid-Afrika, was die spreker by dié geleentheid.
Hy het benadruk dat die meeste kroniese pyn as gevolg van osteo-artritis ontstaan. Na sy mening word rugoperasies te dikwels onnodig uitgevoer.
Volgens Liebenberg behoort drie dinge gedoen te word voordat gedink kan word aan operasies: oefening, terapie en opvoeding oor ‘n gesonde leefstyl.
Oefening hoef nie baie streng te wees nie - stap en dans word veral aanbeveel. Dis belangrik dat gewrigte moet bly beweeg.
Terapie, soos gedoen deur en bv fisioterapeute, chiropraktisyns en terapeute by die pynklinieke is belangrik wanneer die pyn vir maande of selfs jare aanhou.
Liebenberg sê ook ‘n Mediterreense dieët behoort gevolg te word aangesien verkeerde voedselsoorte bydra tot osteo-artritis.
Rugoperasies behoort, volgens Liebenberg, slegs gedoen te word wanneer verlamming ter sprake is, of wanneer breuke deur byvoorbeeld ongelukke, reggemaak moet word. Verder kan en moet vervangingsoperasies wel gedoen word wanneer ‘n knie of heup of ander gewrig heeltemal vernietig is.
Raad is ook gegee oor middels wat help om osteo-artritis te vertraag: Vitamine D3, waarvoor gereelde blootstelling aan sonskyn sorg, vlassaadolie, en magnesium, wat ontspanne in ‘n bad met Engelse sout opgeneem kan word, is ‘n paar.
Almal teenwoordig het aan dr Liebenberg se lippe gehang en vrae uit die gehoor is baie goed beantwoord.