Rolbalspelers van heinde en ver in Suid-Kaap
Die 2024 Perfect Delivery Interdistrikte B-rolbaltoernooi het die afgelope Maandag, 4 Maart, afgeskop. Dit is een van die grootste rolbaltoernooie in Suid-Afrika en word vanjaar beslis op die bane van die Hartenbos-, Mosselbaai- George- en Outeniqua-rolbalklubs.
Dit sal vandag die hoogtepunt wees wanneer die eindstryde in die verskillende afdelings op die bane van die Outeniqua klub beslis word. Die eindstryde begin om 14:00.
Daar is altesame 20 distrikte van al die verskillende provinsies en die meer as 300 spelers, mans en vroue, kom van regoor die land. Onder die spelers en beamptes is verteenwoordigers van onder meer Westelike Provinsie, Limpopo, Mpumalanga, Boland, Grens, Gauteng en Port Natal.
Dit is 'n jaarlikse geleentheid en van die beste rolbalspelers vanuit die verskillende streke se B-spanne, is in aksie.
Die spanne pak mekaar in verskillende afdelings op 'n rondomtalie-basis voor die uitspeelrondes.
Onder die toeskouers Maandag was die oudste aktiewe rolbalspeler in Suid-Afrika, oom Johan Havenga (98), van Pretoria. Hy het nog tot verlede jaar in George gewoon en het sedertdien na sy kinders in Pretoria verhuis. In die verlede was hy onder meer president van die George Rolbalklub.
Penny Dempsey van die reëlingskomitee het Maandag, enkele ure nadat die eerste balle gerol is, gesê dis fantastiese weer. Daar is geen wind en dis 'n pluspunt. "Puik rolbal word gespeel."
Vanoggend word die laaste uitspeelrondes gespeel. Dempsey het mense genooi om die eindstryde by te woon. Toegang is gratis.
Gerrit van Milligen, president van WProlbal en bestuurder van die WP-span, het gesê vir sommige van die spelers is dit die eerste keer dat hulle hul provinsies verteenwoordig. "Hier is talent."
Hy het gesê rolbal is besig om 'n verjonging te ondergaan en die sport het 'n goeie toekoms. Hy glo die sport is meer gewild as wat die geaffilieerde syfers by klubs wys.
Burgemeester, Dirk Kotzé het Maandag, 4 Maart, in sy openingstoespraak by die Hartenbos Rolbalklub, die spanne verwelkom.