Eden Pro Federasie reik uit na alle posduif-entoesiaste
Die Eden Pro Federasie het begin as 'n posduifklub in George. Met takke (klubs) in George, Mosselbaai, Oudtshoorn, en Zoar (naby Ladismith) brei die Eden Pro Federasie vinnig uit deur die Eden Distrik.
Vir stigterslid, Gerhard Swanepoel, het alles met 'n droom begin. 'n Droom om elke persoon in Eden, wat 'n liefde en 'n passie vir wedvlugduiwe het, 'n geleentheid te bied om aan wedvlugte deel te neem, ongeag sy of haar omstandighede of finansiële welstand.
"Diere het 'n besondere kalmerende effek op mense. So ook duiwe. Wedvlugduiwe bring mense bymekaar. Ryk of arm. Oud en jonk. Mans, vroue, kinders, ongeag ons kultuur of agtergrond, ons is almal lief vir duiwe," sê Swanepoel.
"Almal is op een of ander manier geraak deur 'n baie spesiale spesie, die wedvlugduif. Ons verstaan mekaar. Ons praat dieselfde taal. Noem dit sommer die 'duiwetaal'. Ons is een familie. Die 'Duiwefamilie'. Ons wil net graag ons liefde en passie vir duiwe met mekaar en die wêreld deel."
Die doel van die Eden Pro Federasie is om die duiwesport aantreklik te maak vir die publiek deur die sport goedkoper te maak, onder andere met die sewe-seriereëls waar elke lid net sewe duiwe per mandjie mag hê. Die Federasie wil ook die sport na die mense toe bring met mobiele klubhuise. "Ons het die eerste mobiele klubhuis ontwikkel met al die nodige toerusting op 'n voertuig," sê Swanepoel.
Lede sonder vervoer, lede wat gestremd, sieklik of oud is, kan deur middel van ons mobiele klub, duiwe by hul huise of nabygeleë sentrale punte kry. Hulle wil ook die sport vinniger maak deur spoedwedvlugte te hou (maksimum 500km). Nog doelwitte is om opsionele skemas aan te bied vir die lede en om van kleiner, vinniger, en goedkoper vervoer gebruik te maak. "Eden Pro Federasie se hoofdoel is om die duiwesport te groei. Ons beplan om 'n groot volume nuwe duiweboere in die sport in te bring."
Die Federasie werk vir duiweentoesiaste wat nie tans aan die sport deelneem nie, sowel as vir duiweboere, wat van plan is om die sport te verlaat. "Eden Pro Federasie beoefen die duiwesport op 'n vars en nuwe manier, wat 'n nuwe dimensie aan die duiwesport in Suid-Afrika gee. Mense is vir ons baie belangrik. Ons sien die duiwesport as 'n geleentheid om mense se lewens aan te raak en te verbeter."
Volgens Swanepoel is die welsyn van elke duif van kardinale belang. Die bestuur doen gereeld hokbesoeke. Duiweboere word gehelp met onder andere die inenting van hulle duiwe, medikasie, sowel as die nodige raad om hul duiwe optimaal gesond en gelukkig te hou. Die Federasie maak ook gebruik van gemeenskapshokke, waar lede van die gemeenskap gesamentlik betrokke raak by duiwe-wedvlugte uit een hok. Enige iemand wat belangstel in duiwe kan betrokke raak. Hulle bied ook die geleentheid vir besighede om, onder hul besigheidsnaam, teen mekaar wedvlugte te hou. Dit is iets waaroor hulle baie opgewonde is.
Swanepoel nooi graag enige iemand wat deel wil word van die duiwefamilie om hulle te kontak. Enige besigheid wat betrokke wil raak om mense se lewens op hierdie manier aan te raak en te verander, kan hom kontak by 071 426 1012 of per e-pos gerhardswanepoel18@gmail.com.