Siggestremdes leer rolbal speel
Die Suid-Afrikaanse Rolbalkampioenskappe vir gestremde persone vind vanjaar van 17 tot 24 Maart in Kaapstad plaas. Ses spelers van George en Mosselbaai se klubs en vier gidse van die Eden-distrik sal in aksie wees.
Koos Ellis van George Rolbalklub is een van die ses deelnemers. George Nezar van Vista Rolbalklub op Klein-Brakrivier en Pieter Grové van Hartenbos Rolbalklub is rolstoelspelers. Nog lede van Hartenbos sluit in Eben Fourie, 'n B4 siggestremde speler met sy gids, Charles Collen, wat al vir baie jare as 'n span kombineer. Daar is ook groot opgewondenheid oor Hartenbos se twee nuwe siggestremde vroue, Amanda Bester (B1) met Hannetjie Fourie as gids en Maggie Greyling (B2) met Jessie van Heerden as gids, wat sal deelneem. Van Heerden is van Outeniqua Rolbalklub.
“Dié twee nuwe vroue is saam met Eben Fourie werklik 'n inspirasie vir die lede van die Hartenbos Rolbalklub,” sê Hannetjie Fourie.
B1-spelers is totaal siggestremd terwyl B2-spelers lig en donker kan onderskei met beperkte visie van baie naby (byvoorbeeld, weens makulêre degenerasie). B3-spelers sien 'n bietjie meer en kan van enkel-verkykers gebruik maak om die teiken te kan sien. Die B4-spelers se sig is die beste, maar van die spelers kan net die helfte van die rolbalbaan sien. Sommige B4-spelers kan die teiken onderskei, maar kan nie om dit waarneem nie. Hierdie toestand word Retinitis Pigmentosa (tonnelvisie) genoem.
'n Lid van die uitvoerende bestuur, André Taute sê: “Hartenbos Rolbalklub is opgewonde en trots oor die aansluiting van lede met spesiale behoeftes by die klub. Dit is ongelooflik om te sien hoe sulke lede, ondanks hul beperkings, so 'n hoë standaard kan handhaaf. Die entoesiasme en
motivering wat hulle tot die spel bring, is vir die ander lede 'n inspirasie en voorbeeld van deursettingsvermoë. Hoeveel armer sal 'n klub wees sonder sulke spesiale mense,” het Taute gesê.
Een van die klublede, Michelle Snyman, sê: “Ek staan in verwondering oor die nuwe en huidige siggestremde spelers. Dit maak mens nederig om hul entoesiasme te ondervind en te aanskou. As 'n gesonde speler wat my sig as vanselfsprekend aanvaar, geniet ek dit om die vordering en vreugde van dié spelers dop te hou,” het sy gesê.
“Ons hou duim vas en is vol vertroue dat hul nog groot hoogtes gaan bereik.” sê Hannetjie.
Eben en Charles is ook weer gekies om Suid-Afrika te teenwoordig by die
Ons hou duim vas en is vol vertroue dat hul nog groot hoogtes gaan bereik.
Wêreldbyeenkoms vir gestremde spelers, wat vanjaar van 18 tot 31 Mei in Germiston , Gauteng, plaasvind.
Daar word fluks fondse ingesamel om al die spelers by die verskillende toernooie te kry. Vir die nasionale byeenkoms beloop die koste ongeveer
R3 200 per speler terwyl die inter-nasionale kompetisie se koste R26 500.00 beloop.
Indien daar lesers van die Mossel Bay Advertiser is, wat kan help om 'n bydrae of donasie te maak, kan hulle vir Hannetjie kontak by 082 933 2254.
“Ons wil ook graag vir Jessie en lede van Outeniqua Rolbalklub bedank. Hulle het reeds die hande diep in die sakke gesteek en ruim bygedra. Ons sal die lesers op hoogte hou, en ons gaan ons bes doen en vertrou om met medaljes terug te keer huis toe,” sê Hannetjie.