Outeniekwa bly baas om stigtersbeker teen Suid-Kaap
Outeniekwa Sages het op Maandag, 11 Maart, in groot getalle na Mosselbaai opgeruk om die Suid-Kaap in die jaarlikse stryd om die Stigtersbeker die stryd aan te sê. En die stryd was hewig, met Outeniekwa netnet die wenners met 'n gemiddeld van 39,56 Stablefordpunte in die beterbalkompetisie teenoor die 39,25 van Suid-Kaap.
Dit bly 'n pragtige gesig om 120 spelers op 'n lieflike somersdag op die gholfbaan te sien meeding. Mosselbaai se gholfbaan doen beslis sy reputasie gestand as een van die mooiste bane op die Tuintoete. Groot dank gaan aan die Mosselbaai Gholfklub vir die voorbereiding en beskikbaarstelling van die baan, ook vir die organisasie wat met so 'n dag gepaard gaan. Die gesellige samesyn van al die spelers na die tyd is 'n duidelike aanduiding dat die dag suksesvol verloop het.
Uitslae
In die beterbalkompetisie het die volgende pare die beste punte opgestapel:
1. Bennie Geldenhuys en Leon Neveling (SK) 47; 2. Jan van Wyk en Ernie Blommaert (O) 47; 3. Philip Claasse en Theunis Ebersohn (SK) 46; 4. Danie Erasmus en Johan Hattingh (O) 46; 5. Flip Cloete en Jaap van der Westhuizen (O) 44;
6. Colin Perry en Gideon Horn (O) 44. Johan Smit van Outeniekwa se Dolphin's Creek het die naaste aan die pen op putjie 8 aangeteken en Dawid Gerber van Suid-Kaap, Mosselbaai, was die naaste op nommer 15. Theunis Ebersohn, Ernest Roux en Martin Speelman van Suid-Kaap het spogtwees behaal en so ook Chris Mackay en Lloyd Gosling van Outeniekwa. Al die Suid-Kaapspelers wat 'n bottel wyn geskenk het vir die pryswenners asook JC Slagtery van Riversdal vir die worspryse vir die naaste aan die penne word bedank.
Die volgende Sagesbyeenkoms is die Vyfhoekige byeenkoms by Goose Valley op 27-28 Maart.