‘Alles kan deesdae aanlyn bestel word, kinders insluitend’
Die hof kan streng voorwaardes aan 'n 25-jarige man van Mosselbaai, wat met kinderpornografie betrap is, gee en hom op borgtog vrylaat omdat borgtog nie
'n straf is nie en die beskuldigde nog nie skuldig bevind is nie. Dit was een van redes wat die verdediging tydens betooghoofde in die borgaansoek van die beskuldigde voorgehou het met sy hofverskyning die afgelope Woensdag in die Mosselbaailanddroshof.
Die verdagte, wat in Da Nova woon, is sedert 2 Februarie in aanhouding nadat ongeveer 48 eksplisiete foto's van kinderpornografie, wat meestal dade met kleutermeisies wys, op sy selfoon gevind is. Die staat het 'n aantal toestelle, wat altesaam meer as 1,2 miljoen foto’s op het, van die verdagte gekonfiskeer.
Die staat staan sy borgaansoek teen. Die hoofrede wat die staat aanvoer is weens die erns van die misdrywe en dat dit in belang van geregtigheid is dat borgtog geweier word.
Advokaat Gerda Marx het gedurende haar betoog aan die hof gesê die vraag is of dit in die belang van geregtigheid is om vrylating van die beskuldigde op borgtog toe te laat.
Sy het gesê die betrokke misdryf is teen kinders gepleeg. "Die beskuldigde skep die mark vir die vervaardiging van kinderpornografiese beelde. As daar geen aanvraag is nie, sal daar geen skepping wees nie. Die beskuldigde is indirek verantwoordelik vir die seksuele misbruik en verkragting van kinders. Dit is 'n baie ernstige oortreding en kinders wêreldwyd moet beskerm word teen mense soos dié beskuldigdes."
Marx het gesê alles kan deesdae aanlyn bestel en afgelewer word, "kinders insluitend". Sy het aan die hof gesê aanlyn uitbuiting van kinders is aan die orde van die dag.
"Roofdiere hoef nie in die strate te dwaal om toegang tot kinders te kry nie. Daar is net 'n selfoon en internet nodig.
Die beskuldigde is in besit gevind van grusame beelde waar kinders mishandel word. Dit is my submissie dat die beskuldigde inderdaad 'n gevaar vir kinders is.
Beelde van kinders wat telkens aanlyn verkoop en uitgeruil word, veroorsaak uiterste trauma en herhaalde uitbuiting van daardie kind. Die kind in elke beeld is iemand se kind, is 'n persoon op haar eie."
Die saak is uitgestel tot 22 April vir uitspraak in die borgaansoek. Die beskuldigde bly in aanhouding.
Beelde van kinders wat telkens aanlyn verkoop en uitgeruil word, veroorsaak uiterste trauma en herhaalde uitbuiting van daardie kind.