Voorreg om Ligtoring-roete te stap vir ‘n ‘recce’
Erns Grundlingh, aanbieder van Eldersprogram, kykNET:
Dit was ’n groot voorreg om onlangs die eerste week van die Pelgrimstog van Hoop se Ligtoring-roete saam met Gerrie van Deventer, Johan Nieuwenhuizen, Carel van der Merwe en my goeie vriend, Le Roux Schoeman, te kon stap.
Behalwe dat ek sedert 2020 betrokke is by die Pelgrimstog van Hoop, was hierdie staptog ook ’n eerste verkenning, of recce, vir ’n nuwe seisoen van die kykNET-reeks Elders.
Ek wil nie nou al te veel weggee nie, maar dit is duidelik dat Seisoen 7 ’n plaaslike reeks gaan wees en dat ek weer baie gaan stap.
Ons beplan om die reeks in September vanjaar te skiet.
My vrou Catharien verwag ons kinders - ja, dit is ’n tweeling - einde April, en ek moet eers vir ’n paar maande help doeke omruil, babas bad en voer en ook na Catharien kyk voor ek weer my rooi hoed kan dra en die Ligtoring-roete stap van Mosselbaai tot by Kaap Agulhas.
Die Ligtoring-roete is fantasties, met verstommende natuurskoon en wonderlike en gasvrye mense langs die pad.
Ek het al wyd gereis deur Suid-Afrika, maar dit was die eerste keer dat ek plekke langs die kus soos Danabaai, Boggomsbaai, Vleesbaai, Gouritsmond, Melkhoutfontein en Jongensfontein besoek het.
Die rotse by Pinnacle Point, die strand tussen Danabaai en Vleesbaai, die Gouritsrivier, die duineveld buite Stilbaai, al die heerlike gesprekke, smullekker kos en groot bederf by die herbergiers … te veel om op te noem.
My stapmaats was ook heerlike geselskap en ons het lekker gelag én gesweet, want maklik was dit ook nie altyd nie.
Ek bly opgewonde oor die Pelgrimstog van Hoop se potensiaal as ’n netwerk van roetes met integriteit, ’n sterk etos en ’n inklusiewe ingesteldheid.
Gerrie van Deventer het ’n groot hoeveelheid tyd en energie belê om die roete te ontwikkel en goeie verhoudings langs die pad te bou.
Mag die Ligtoring-roete nog baie pelgrims met rooi hoede lok en mense inspireer om meer gereeld te stap en ook na hulle psigiese gesondheid om te sien, en hoop te vind vir Suid-Afrika en al sy mense.