Mosselbaai-area spring groot skade vry
Sedert Saterdag, 6 April, het die vlak 4-waarskuwing wat deur die SuidAfrikaanse Weerdiens uitgereik is met die ontwrigtende reën, gelukkig nie groot skade vir Mosselbaai en omliggende gebiede teweeg gebring nie.
Vloede het wel voorgekom en op Dinsdag, 9 April, het die George-munisipaliteit die Outeniqua Pas vir 'n tyd lank gesluit waartydens Rampbestuursdienste oormatige water op die padoppervlak gevee het.
Berigte is ook ontvang dat die Blesbokpad oor die Brandwagrivier by Ruiterbos ook gesluit is weens vloedwaters. Boere in die Ruiterbos omgewing het oornag Maandag, 8 April tot Dinsdag, 9 April, tussen 50mm en 75mm reënval gemeet.
Die Moordkuilrivier, Leeukloof, naby Ruiterbos was ook Dinsdag in vloed. Omliggende gebiede, insluitend Botlierskop, was ontoeganklik. Die Wolwedansdam in Groot-Brakrivier het begin oorloop. Dié dam het binne een dag op Dinsdag, 9 April, van 92,03% tot meer as 100% gestyg. Voorbereidings deur die Mosselbaaimunisipaliteit is reeds Saterdag, 6 April, gemaak deur die mond van die GrootBrakrivier oop te maak om oorstromings in die laerliggende areas te voorkom.
Dieselfde dag op Dinsdag, 9 April, na die baie reën deur die nag, het die laagwaterbrug
in die Koumarivier op die Haelkraalpad op Ruiterbos oorstroom.
Die Tuinroete en ander distrikte was vir 'n groot gedeelte van die week onder vlak 4 waarskuwings vir hewige reënval en vloede en nooddienste was op gereedheidsgrondslag vir enige gebeurlikhede.
Op 9 April het die Tuinroete Rampbestuursdienste die volgende reënvalsyfers vir die 24-uur tydperk vanaf 8 tot 9 April vrygestel.
George Tierkop - 158mm Wilderness - 163mm
Knysna – 79mm Plettenbergbaai – 31mm Oudtshoorn – 65mm Mosselbaai - 102mm
Ladismith - 40mm
Die damvlakke is op 9 April as volg gemeet:
Duiwenhoksdam - 125% Calitzdorpdam - 95% Oukloofdam - 85% Gamkadam - 77% Kamanassiedam - 73% Wolwedansdam - 100% Tuinroetedam - 100%
Vir enige noodgevalle kan die volgende nommers geskakel word. (Mosselbaaimunisipaliteit – alle ure 044 606 5000 of Mosselbaai brand-, redding- en rampbestuur 044 606 5121)