Lede van boubedryf daag in hul massas op
Rolspelers in die boubedryf het vandeesweek in hul massas opgedaag vir 'n vergadering met lede van die munisipaliteit se bouafdeling asook die burgemeester, Dirk Kotzé, oor kwessies wat hulle ondervind ten opsigte van bouplanaansoeke se goedkeuringstyd en meer.
Aanvanklik het beide die burgemeester en die direkteur beplanning en ekonomiese ontwikkeling, Carel Venter, op hul beurte die gehoor toegespreek.
Die sprekers was dit eens dat dié platform geskep is sodat kwessies oor gepraat en oplossings gevind moet word.
Venter het spesifiek uitgebrei oor uitdagings binne die betrokke afdeling weens bedankings en die daaropvolgende personeeltekorte. Maar, hy sê, ook dit het intussen verbeter.
Hy vertel verder hy het onlangs na ander munisipaliteite uitgereik om te uit te vind wat hul statistieke is met betrekking tot bouplanne wat hulle inkry het en bouplanne wat goedgekeur is oor die laaste ses maande. Hy het drie munisipaliteite se terugvoer reeds ontvang. Hul persentasies goedkeurings teenoor aansoeke ontvang was onderskeidelik, 87%, 48% en 89%, waar Mosselbaai s'n 105% is. Dit sluit nou agterstallige aansoeke in.
Terugvoer verwelkom
In 'n stadium verlede jaar, sê hy, het die afdeling op 67% kapasiteit gefunksioneer.
Hoewel daar verbetering is, erken hy dat daar steeds nog verbetering kan wees en het terugvoer vanuit die gemeenskap verwelkom wat uit die vergadering gekom het.
Kwessies wat die teenwoordige rolspelers (ontwikkelaars, bouers, argitekte en meer) geopper het, handel meestal oor tyd. Die tyd wat dit neem vir 'n aansoek om goedgekeur te word; kommentaar op 'n aansoek, wat onvolledig is en dus nóg meer tyd byvoeg, die tyd aan okkupasiesertifikate verbonde en meer.
Venter het te kenne gegee dat verbetering hier beslis gedoen kan word en het onderneem om aandag te gee aan individuele gevalle wat nie die norm is nie. Hy het ook klem daarop gelê hoe belangrik dit is om planne korrek in te gee. Volgens hom is van die planne, wat ingedien word, skrikwekkend, maar hy het ook genoem dat diegene by die vergadering teenwoordig waarskynlik nie die skuldiges is nie.
In antwoord het sommige lede in die gehoor gesê ofskoon die hele checklist vir aansoeke nagekom word, word dit soms stééds terugverwys. Venter het gesê dit sal ondersoek word.
Beide Venter en die burgemeester het gesê die bouplanafdeling het geen ander keuse as om streng te wees met aansoeke en hulle sal by staande beleide hou, maar wanneer 'n bouplan korrek ingedien word, poog hulle om dit binne 30 dae goedgekeur te kry.
Talle ander kwessies is bespreek en terugvoer is belowe.
Die skynbare gevoel teen die afsluiting van die vergadering was dat dit ordelik en met wedersydse respek hanteer is.