Spekboomdoolhof kom aan
Heiderand spog eersdaags met ‘n unieke en besonderse aktiwiteitsaanwins. Lede van die publiek wat in Apiesdoringstraat in Heiderand gery het, het waarskynlik lede van die Mosselbaai-munisipaliteit se parkespan in die oop ruimte langs die straat aan die werk opgemerk. Dit is die begin van die langverwagte spekboomdoolhof waartoe menige Mosselbaaier bygedra het deur spekboomsteggies te skenk.
In September en Oktober 2023 het die munisipaliteit 'n oproep tot aksie gedoen vir skenkings om 'n totaal van 6 000 steggies in te samel, wat benodig is om dié inisiatief 'n werklikheid te maak. Die teiken is vroeër vanjaar bereik toe die finale skenking in Wolseley ingesamel is. Op die oomblik word die basiese voorbereidings vir die doolhof gedoen en as die weer dit toelaat, begin die plantery op 6 Mei.
Die parke afdeling was die afgelope week of wat doenig om die uitleg van die doolhof uit te merk. Wat daarop volg is die uitmerk van die 6 000 plekkies waar die spekbome ‘n bepaalde afstand uitmekaar geplant sal word. Danksy die departement bosbou, visserye en die omgewing, word fondse bewillig om tien uitgebreide openbare werke program-werkers aan te stel en te betaal om met die plantwerk te begin.
Opvoedkundige aktiwiteite
Daar word beplan dat die doolhof, wat ongeveer 40m by 40m sal beslaan, verskillende stasies of ruimtes sal insluit. Dit sal onder meer opvoedkundige aktiwiteite gemik op kinders insluit. Danksy deelname en belangstelling vanuit die publiek, is daar ook speletjies wat deur middel van houtrame in die doolhof opgerig sal word. Dit sluit onder meer kruisies en kringetjies in, soos die munisipaliteit reeds by ‘n park in Bayview geïmplementeer het.
Die munisipaliteit het reeds in die beplanningsfase die publieke veiligheid in ag geneem met betrekking tot die vestiging van die doolhof. Daarom sal die hoogte van die spekbome beperk word. Ander maatreëls soos die inplant van pale wat toegang vir fietse sal verhoed, word ook beplan. Die doolhoof is uitsluitlik vir stappers en dit word in die vooruitsig gestel dat die paadjies ruim genoeg sal wees om twee-twee stappers langs mekaar toe te laat.
Bo en behalwe die genoemde maatreëls, is ‘n vergadering tussen die munisipaliteit, die wyksraadslid en belanghebbendes soos die munisipaliteit se vennote in gemeenskapsveiligheid, onder andere Heiderand-buurtwag en Suid-Afrikaanse Polisiediens in die beplanning om enige verdere versoeke aan te hoor.