Lank verwagte opgradering van rugbyveld
Luide applous het gevolg nadat die eerste sooi Dinsdagmiddag, 23 April, gespit is by die Sonskynvallei-rugbyveld, wat ná ‘n onderhandelingsproses van nagenoeg drie jaar, uiteindelik volgens die korrekte sportstandaarde opgeknap sal word. Die veld, wat tans eintlik net vir sosiale spel geskik is, lê oos na wes en vir die plaaslike rugbyklub om enigsins sy kans te verbeter om in ‘n hoër liga te kan meeding, moet die veld volgens die standaard noord na suid lê.
Die projek word van stapel gestuur danksy ‘n memorandum van ooreenkoms tussen die Mosselbaai-munisipaliteit en Terblanche Transport. As een van die voorwaardes om hulle mynlisensie vir die bedryf van ‘n gruisgroef te behou, moet Terblanche Transport ‘n korporatiewe sosiale investeringsprojek aanpak.
Nadat ‘n behoeftebepalingproses, wat deur die Mosselbaai-munisipaliteit se direktoraat gemeenskapsdienste, spesifiek die kantoor vir landelike ontwikkeling onderneem is, asook verskeie gesprekke met die gemeenskap van Sonskynvallei wat feitlik Terblanche Transport se bure is, is daar op dié projek ooreengekom.
Met die bouwerk aan ‘n behuisingsprojek
aangrensend aan die rugbyveld in Sonskynvallei, was dit egter nie net ‘n kwessie van “draai die veld” nie. ‘n Taamlike mate van grondverskuiwingswerk word vereis, wat ‘n aansienlike kapitale uitgawe sal behels.
‘n Item het voor die raad gedien waarin die projek, asook die memorandum van ooreenkoms eers goedgekeur is. Daarna moes goedkeuring, alvorens die projek kon begin, van die departement minerale huplbronne en energie verkry word. Die goedkeuringsbrief is aan die begin van April ontvang. Die goedgekeurde bedrag is R250 000.
Nadat die grondwerk afgehandel is, sal die Mosselbaai-munisipaliteit in terme van die memorandum van ooreenkoms verdere werk by die rugbyveld voltooi. Dit sal insluit die omheining, die aanplant van gras én die installering van ‘n besproeiingstelsel.
Tiaan Barnard, wat Terblanche Transport by die sooispit-seremonie verteenwoordig het, het genoem dat die grondwerk ongeveer drie weke sal duur.
Wyksraadslid Stefan Botha het Terblanche Transport names die plaaslike rugbyklub, Sunshine United, bedank vir die finansiële inspuiting in die Sonskynvallei-gemeenskap. Die uitvoerende burgemeester van Mosselbaai, raadsheer Dirk Kotzé, wat self ‘n groot sportentoesias is, het ook dié geleentheid bygewoon.