AfriForum Midbrak Buurtwag
Verskeie voertuie en AfriForum-patrolleerders en sekuriteitsbeamptes was betrokke by die massapatrollie die afgelope naweek.
AfriForum Midbrak Buurtwag-lede wat hulle tyd en eie veiligheid in gedrang stel vir die veiligheid van Midbrak-gemeenskap, het Vrydag, 19 April, weer ‘n suksesvolle Nasionale massa- en bewusmakingspatrollie saam met die area se sekuriteitsmaatskappye gehou. AfriForum, met ongeveer 180 buurtwagte landswyd, hou gereeld sulke massa- en bewusmakingspatrollies.
Die hoofdoel was om die plaaslike gemeenskap te wys dat hulle daar is om misdaad te bekamp en sigbaar te wees en ‘n verskil te maak in samewerking met die sekuriteitsmaatskappye én die polisie. Dié patrollies, wat minstens vier keer per jaar gehou word, het om 18:00 begin en daar was verskeie voertuie en AfriForum patrolleerders en sekuriteitsbeamptes betrokke. Verskeie deurnagpatrollies deur AfriForum Midbrak Buurtwag in die area het tot 07:00 Saterdagoggend geduur.
AfriForum Midbrak Buurtwag bedien die Riverside-, Klein Brak-, Fraaiuitsig-, Reebok-, Tergniet- en De Langewoongebiede. Daar word daagliks en snags patrollies in die onderskeie areas onderneem.
Die patrollie- en buurtwagbestuurslede ondergaan ook deur die jaar gereelde professionele opleidingskursusse.
Hans Meiring, die buurtwagleier, het gemeld dat dit ‘n groot sukses was en sy dank uitgespreek aan elke patrollielid wat hulle tyd en brandstof opoffer om gereeld patrollies in die area te ry om die veiligheid van ons gemeenskap te verseker. Baie van hierdie lede het ook hulle daaglikse werk om aan aandag te gee, maar is nogtans bereid om ‘n verskil in die gemeenskap te maak.
Maak 'n verskil
AfriForum Midbrak Buurtwag het lede wat opgeleide mediese personeel is, wat dadelik mediese bystand op ‘n ongelukstoneel of in ander noodsituasies kan verleen. AfriForum het ook opgeleide trauma beraders beskikbaar indien nodig.
Alle patrollielede is toegewyde persone, wat ‘n verskil in die gemeenskap en area
wil maak. AfriForum bied weekliks aanlyn opleidingsessies aan om patrollielede asook AfriForum-lede op te lei in sake wat ons almal raak soos byvoorbeeld die teenkapings module waar die publiek en lede weer eens bewus gemaak word van gevaartekens en wat om te doen indien jy jou in so ‘n lewensgevaarlike situasie bevind.
Die patrollie- en buurtwag-bestuurslede ondergaan ook deur die jaar gereelde professionele opleidingskursusse. Die eerste kursusse het onlangs in Touwsrivier plaasgevind waar daar weer verskeie protospan-lede (reaksiespan-lede) suksesvol opgelei is.
Daar is verskeie AfriForum-lede wat van ander provinsies hierheen trek en word versoek om by die plaaslike AfriForum Buurtwag in te skakel sodat hul lidmaatskap na die Mosselbaai-tak oorgedra kan word.
Indien u meer inligting verlang met betrekking tot die talle voordele van AfriForum-lidmaatskap en om deel te wees van ‘n plaaslike AfriForum Buurtwag, kontak gerus vir Amanda Lategan op 082 487 7077.