Kennis oor volstruise word by VLV gedeel
Die Hartenbos VLV-tak het op Dinsdag, 23 April, hulle maandelikse ledebyeenkoms gehou. By die geleentheid het Hannes en Christine Uys, volstruisboere van die plaas Waterkloof in die Heidelberg distrik, as gassprekers opgetree en die lede meer oor volstruise vertel.
Hannes begin met die siklus van die volstruis, wat vir die boer begin met die kollektering van die eiers uit die neste, daarna die uitbroeifases wat eindig sodra die kuikentjie uit die dop is. Die verskillende fases van die groeiproses is verduidelik wat eindig wanneer hulle vir hul spesifieke doel aangewend word, slag en aanteling.
Volstruise wat geslag word, het vier hoofprodukte wat ekonomies benut word, naamlik die vere, vel, eiers en vleis. Elkeen het sy eie gebruike en ekonomiese en/of voedselaanwending. Vere en velle is in groot aanvraag in Europese en Suid-Amerikaanse lande, hoofsaaklike ‘n die modewêreld.
Christine het die lede hierna toegelig oor die verskillende vleissnitte van ‘n volstruiskarkas. Kosbare wenke vir die voorbereiding en bediening van volstruisvleis, is gedeel.
Filette word in die regte formaat gekoop, gewoonlik in ‘n waaiervormige snit. Marinade vir die filet kan gemaak word met olie, braaivleissout, of ‘n rooiwynsous. Na voorbereiding moet volstuisfilette dadelik geëet word, dit moenie rus nie.
Ook blokkiesvleis en maalvleis kan voorberei word. ‘n Nuttige wenk is dat dit in vog gaargemaak moet word, maar nie water nie. Kry vog van tamatie, blatjang of aftreksel. Maalvleis moet voordurend geroer en hompe vleis plat gedruk word.
Afvalvleis word gebruik vir troeteldierkos en word meestal uitgevoer.
Een volstruiseier maak 24 hoendereiers, +- 45ml volstruiseier maak een gemiddelde hoendereier. Volstruiseier uit die dop, kan geklits word en oortollige eier kan gevries word.
Persone wat belangstel om by die Hartenbos VLV-tak aan te sluit of navraag wil doen oor die werksaamhede van die tak, kan die voorsitter, Rolien Smit (084 621 2838) kontak.