Die kat kom weer
Daar was verlede Vrydag groot opgewondenheid by Laerskool Hartenbos toe Daantjie Kat senior, een van die Mosselbaai-munisipaliteit se hardwerkendste amptenare, die leisels amptelik aan Daantjie Kat junior oorhandig het.
Daantjie Kat is dekades lank reeds sinoniem met padveiligheid-opvoeding regoor Suid-Afrika.
Maryke Zeeman van munisipale verkeersdienste, doen reeds die afgelope 14 jaar opvoedkundige sessies saam met dié groot kat, wie se uniform al ‘n bietjie afgeleef begin lyk het.
Na beplanning en produksie van ongeveer 10 maande, is Daantjie Kat junior nou gereed om die goeie werk deur munisipale verkeersdienste by skole voort te sit.
Burgemeester van Mosselbaai, Dirk Kotzé, het ook die bekendstelling by Laerskool Hartenbos bygewoon.
Werner van Huyssteen, hoof van Laerskool Hartenbos, het bygevoeg dat padveiligheidopvoeding deur die munisipaliteit aangebied, ‘n groot bydrae tot die skool
lewer. Die skool het ook ‘n padveiligheidopleidingsentrum, befonds deur die provinsiale verkeersdepartement waar die jongspan speel-speel van padveiligheid leer.
“Kinders is so vatbaar vir informasie en altyd uiters eerlik.
Daarom is hulle eintlik die ideale manier om ouers te bereik met ‘n boodskap van padveiligheid. Ons is dankbaar teenoor die munisipale verkeersdepartement wat ons gereeld besoek en ook van hulp is met die opleiding van ons skolierpatrollie.”
Zeeman sê sy en Daantjie senior het baie jare saam skolebesoek gedoen en ‘n klomp kilometers saam afgelê.
"Dit was moeilik om te groet, maar ons sien uit na wat Daantjie junior alles gaan vermag.”
Die afgetrede Daantjie Kat sal dalk van tyd-tot-tyd moet uithelp, indien sy jong plaasvervanger dalk te besig raak.