Dit knal in die klowe op Nooitgedag
Die Potgieters van die plaas Nooitgedag buite Calitzdorp, het op Saterdag, 20 April, die rigting aangewys vir deelnemers van Suid-Kaap Jagters en Bewaringsvereniging (SJB) se veldskiet. Die opkoms was goed en inskrywings het ingestroom uit dele van die Tuinroete, Karoo en Klein Karoo vir die jaggeweeruitdaging.
Die Karoo-son het vroeg al gebak en die koelte was skraal onder die doringbome, maar dit het nie die entoesiasme van die 55 skuts gedemp nie. Vyf bane is opgestel met papierteikens en gongs. Die naaste papierteiken is opgestel op ‘n afstand van 60 meter en die verste gong moes oor ‘n afstand van net oor die 300 meter getref word. Skuts was tydgebonde en is vyf skote per baan toegelaat. Hulle skietvernuf is behoorlik op die proef gestel. Hulle moes uit verskeie skietposisies skiet. By van die bane kon hulle rus neem oor hooibale en by ander bane was daar skietstutte wat gebruik was. Vir kwesskote was punte afgetrek. Baanoffisiere van
Hulle skietvernuf is behoorlik op die proef gestel. Hulle moes uit verskeie skietposisies skiet.
Mosselbaai, Riversdal en Albertinia het bane beman en gesorg dat veiligheid eerste kom.
Skuts kon deelneem in vier afdelings. Die veterane het mekaar behoorlik die stryd aangesê. In dié afdeling het Ford Winnertz met ‘n enkele punt geseëvier. Zoey Botha het haar titel in die vroue-afdeling verdedig en die jaar weer die goue medalje op die tafel verower.
Voorsitter van SJB, Wynand Fourie, bedank almal wat bygedra het om van dié dag ‘n reuse sukses te maak. "Die harde werk word nie misgekyk nie en die groothartigheid van plaaslike besighede wat saamstaan om die kompetisie aan te bied word hoog op prys gestel. Die goeie opkoms bewys weer eens dat dit ‘n gesogte sport is wat beoefen en geniet word deur oud en jonk. Daar is min sportsoorte waar ‘n oupa en sy kleinseun kan deelneem in dieselfde kompetisie.”
SJB nooi alle belangstellendes om die webwerf te besoek of die kantoor te kontak by www.suidkaapjagters.co.za of 044-6952319.