Mosselbaai Rugbyklub skop goed af
Die Hi-Q Mosselbaai Rugbyklub, oftewel die Mosselbaai Marlyne, is ná 'n afwesigheid van langer as 'n jaar, vanjaar weer in aksie in die Suidwestelike Distrikte (SWD) se Kusliga. Die Marlyne was die afgelope Saterdag op Riversdal in aksie waar hulle die span van United Kings in die Garcia Stadion behoorlik afgestof het deur dié kragmeting met 59-0 te wen. Dit was die Marlyne se tweede wedstryd in die liga ná die span van Sunshine United van Sonskynvallei in die eerste wedstryd ook met 5-17 die knie moes buig teen die Mosselbaaiers.
Die Marlyne, wat in dié stadium net met een span in die liga in aksie is, het teen Kings van die begin die krane oopgedraai en nege keer agter die doellyn van die tuisspan gaan kuier. Met die rustyd was die telling reeds 38-0 in die guns van die besoekers.
Vir Mosselbaai het JP Smit (2), Johan van Wyk, Coenie Jansen van Rensburg, JC Barnardo (kaptein), Ryan du Rand, Chris
Horn, Seger du Plessis en Brandon Spies agter kings se doellyn gaan afrond terwyl Samuel Vos met sewe doelskoppe suksesvol was.
Volgens die president, Riaan van der Heyde, sien hulle baie uit na die 2024-seisoen en is nuwe belangstellendes steeds welkom om by die klub aan te sluit. Oefentye is Maandae en Donderdae van 18:00 tot 21:00 in die Van Riebeeck Stadion. Vir meer inligting kan die hoofafrigter, Jaco Prinsloo, (082 875 7055) gekontak word.
Saterdag
Mosselbaai het môre, Saterdag, 27 April, 'n tuiswedstryd wanneer hulle in die Van Riebeeck Stadion teen Proteas van Ruiterbos te staan kom. Die hekke open reeds om 14:00 met die afskoptyd, wat om 15:00 is.
Toegang beloop R20 per volwassene, R10 vir kinders en R10 per voertuig.